№23

19-май. Ингье, фадлай вил алай и югъни алукьна. ХХ асирдин Гомер, Дагъустандин халкьдин шаир СтIал Сулейманан 140 йисан юбилейдин шадвилин мярекат адан хайи Ватанда вири халкьдин иштираквал аваз тешкиллувилелди кьиле тухун патал райондин руководстводи, талукь къуллугъри виликамаз вири гьазурвилер акунвай.

Малум тирвал, вичин яратмишунралди неинки лезги халкь, гьакI Дагъустанни вири дуьньядиз машгьур авур чIехи шаир, ХХ асирдин Гомер СтIал Сулейманан 140 йисан юбилейдин гьуьрметдай алай 2009-йис Сулейманан йис яз малумарнава. И лишанлу вакъиадиз талукьарна гзаф чкайра шадвилин мярекатар, кIелдайбурун конференцияр, конкурсар кьиле тухузва. Идалди адан яратмишунрал рикI алайбуру чпин патай чIехи шаирдиз авай гьуьрмет, сейливал къалурзава.