Виридуьньядин дишегьлийрин югъ.
Ам чна къейд ийиз шумуд йисар алатнава. Анжах и сувар ни арадал гъайиди ятIа, гьа кар виридаз чизвач жеди. 1910-йисуз суварин бине кутурбур дишегьлийрин социалист гьерекатдин активисткаяр тир. Абурун кьилени Клара Цеткина акъвазнавай. Пуд йисалай сифте яз и югъ Россияда къейд авуна. Гьа чIавалай инихъ и сувар рикI алаз кьиле тухузва. И юкъуз Дишегьлидал гьейранвал къалур тавуна, къерехда акъваздай инсан бажагьат жеда.
Дишегьлийрин югъ тир 8-Март Виридуьньяда ислягьвал ва яшайишдин рекьяй вилик финиф, азадвал ва халкьарин аслу туширвал патал женгинин фикиррин садвилин ва сад тир къуватрин югъ яз къейд ийизва. Ам къейд авуналди инсанри дишегьли-дидедиз, дишегьли-зегьметчидиз, дишегьли-ватанпересдиз чухсагъул лугьузва ва еке гьуьрмет ийизва.
«Ширин затIар гзаф ава дуьньяда,
Сад лагьайди вун я, диде, чан диде»,
Лезги чилел вичин дидедиз и мани талагьай бала аватIа? И дуьньядал вичин баладиз лайлаяр ягъ тавур диде алатIа? Дидедикай, адан зегьметдикай гьикьван макъалаяр, зурба поэмаяр кхьейтIани, абурун гьикаятдинни шииратдин чIал я кесиб, я акьалтIна куьтягь жедач. Дидедин зегьметдикай тема эбеди яз амукьзавайбурукай ва гьар сеферда, тикрар техжез, Дишегьлидин къамат цIийи-цIийи терефрихъай ачухдайди жеда. Уьмуьрдин гьи тереф къачуртIани, Диде-дишегьли сифте чкадал эциг тийизвайди аквадач, амма, кьилинди яз, адан хиве асул – гьисабдай хзандин къул хуьн ава.
Чилел бажармишзавай лап хъсан ва къени крар дишегьлидин тIварцIихъ галаз алакъалу я. Диде дишегьли!
Дишегьли барабар ихтиярар авай зегьметчи ва чи обществодин активный член хьанва.
- Итимдизни дишегьлидиз барабар ихтиярар, адан азадвилер ва абур кьиле тухудай барабар мумкинвилер ава, - кхьенва РФ-дин Конституцияда.
Государстводи дишегьлидин гьал хъсанарунин гьакъиндай гьамиша къайгъударвал ийизва. Ватандиз кьадар авачиркьван вафалу тир чи дишегьлийри политикадин, яшайишдин, экономикадин ва культурадин вири хилера активдаказ иштиракзава.
Абур цIийи крарик кьил кутунин инициаторар ва тешкилатчияр, жегьилрин кар алакьдай несигьатчияр я.
Чи райондин дишегьлийрини экономика, илим ва культура хкажунин кардик лайихлу пай кутуна ва алай вахтундани и кар давамарзава. Абурун жергедай яз чаз къе и лишанлу йикъан вилик сувар рикIин сидкьидай тебрик авуналди РФ-дин социальный обеспеченидин лайихлу работник М. С. Абдулмуталибовадин, ДР-дин муниципальный къуллугъдин лайихлу работникар А. М. Рагьметулаевадинни Р. А. Исламовадин, «сельсовет Цмурский» МО-дин кьил Р. А. Алибековадин, «сельсовет Уллу-Гатагский» МО-дин кьил З. Агъарзаевадин, ДР-дин культурадин лайихлу работник, Дагъустандин халкьдин шаир СтIал Сулейманан музейдин директор Л. М. Стальскаядин, ЦРБ-дин кьилин духтурдин заместитель Р. С. Гъаниевадин, МСЭ-дин председатель Ж. Г. Гьусейновадин, акьалтзавай несилдиз чирвилер ва тербия гузвай, РФ-дин Президентдин Грантдин сагьибар тир М. А. Асалиевадин, В. А. Якьубовадин, М. И. Оружевадин, Н. Н. Тагьировадин, Ф. К. Камиловадин, Ж. И. Мирзоевадин, Р. С. Тажибовадин, С. К. Ибрамхалиловадин, Ф, Б. Закарьяевадин, С. Р. Османовадин, Н. М. Мегьамедовадин, А. Х. Наврузовадин, Г. А. Межидовадин, райондин мировой суддин судья Т. А. Алиевадин ва гьакъисагъвилелди зегьмет чIугвазвай гзаф маса дишегьлийрин тIварар еке гьуьрметдивди кьаз кIанзава.
8-Март- гатфарин сифте кьил я. Гьавиляй гуьзел гатфарин сифте суварни дишегьлийриз бахшнава. Гьа гатфар хьиз, дишегьлиярни гуьзел я. Адан азадвал, ихтияррин барабарвал патал малумарай женгинин и югъ къе чи баркаллу дидейриз, рушариз, вахариз, папариз гьуьрмет авунин лап зурба сувариз элкъвенва.
Къуй куь уьмуьрдин рехъ гьамиша рагъ авайди хьурай, ислягьвилин, аялрин ва зегьметдин иесияр тир Дишегьлияр!