2008-йисан 26-декабрдиз 293-ФЗ нумрадик кваз акъуднавай Федеральный Закондин бинедаллаз къенепатан крарин органриз физический ва юридический ксарин финансовый, майишатдин, карчивилин ва алишверишдин кIвалах ахтармишдай ихтияр гузвай «Милициядин гьакъиндай» РФ-дин Закон къуватдай аватнавайди яз гьисабна.
Гьа са вахтунда республикадин прокуратурадиз къвезвай делилри а кардин гьакъиндай шагьидвалзава хьи, республикадин къенепатан крарин органрин работникри, потребителрин ихтиярар чIуруникай багьна кьуналди, карчивилин субъектрин алишверишдин кIвалах ахтармишун давамарзава, абурухъ лицензияр ва ихтияр гузвай маса документар аватIа ахтармишзава, абурун нетижайрин бинедаллаз «алишверишдин карханаяр ахтармишунин актар» кхьизва, лицензияр, сертификатар ва ихтияр гудай маса документар тахьуниз килигна карчияр административный жавабдарвилиз чIугвазва.
Милициядин работникри ихьтин ахтармишунар кьиле тухун федеральный законодательство векъидаказ чIурун я ва и карди абуру чпин къуллугъдин везифаяр артухарзавайди къалурзава.
ИкI, «Милициядин гьакъиндай» Закондин 11-статьядин 2-пунктунин бинедаллаз чпин хиве тунвай везифаяр кьилиз акъудун патал милициядиз, РФ-дин законодательстводихъ галаз кьадайвал, тайин гьерекатар авун, тайин кIвалахдал машгъул хьун патал физический ва юридический ксариз ихтияр (лицензия) аватIа ахтармишдай ихтияр ганва.
Россиядин Федерациядин Правительстводи 2006-йисан 26-январдиз 45-нумрадик кваз акъуднавай «Об организации лицензирования отдельных видов деятельности» Постановленидихъ галаз кьадайвал, Россиядин МВД агъадихъ алай кIвалахар кьиле тухудай ихтияр гудай орган яз тайинарнава: охранадин ва сыскной кIвалах, алишвериш, яракьар, абурун тайин паяр, патрумар, экспонировать ва коллекционировать авун.
Гьа икI, милициядиз винидихъ къалурнавай кIвалахрин жуьрейрал машгъул жезвай физический ва юридический ксар ахтармишдай, ва и жигьетдай абурухъ талукь ихтиярар (лицензияр) аватIа чирдай ихтияр ава.