27-апрелдиз «Сулейман-Стальский район» муниципальный райондин депутатрин Собранидин 11-сессия кьиле фена.
Адан кIвалахда Собранидин депутатрилай гъейри райондин администрациядин управленийрин, отделрин руководителри, хуьрерин администрацийрин кьилери ва гьялзавай месэлайрихъ галаз алакъалу теклифнавай маса юлдашри иштиракна.
Анал алай месэлайрикай лугьуналди, сессия райондин депутатрин Собранидин председателдин заместитель Нариман Шамсудинович Абдулмуталибова ачухна ва кьиле тухвана.
Сессиядал агъадихъ галай месэлайриз килигна:
1. «Сулейман-Стальский район» муниципальный тешкилатдин контрольно-счетный палатади 2008-йисуз авур кIвалахдин гьакъиндай гьахъ-гьисаб.
2. «Сулейман-Стальский район» муниципальный тешкилатдин Уставдик дегишвилер ва алаваяр кухтунин гьакъиндай.
3. Муниципальный райондин органрин ва кьилдин къуллугърин правовой актар ва маса документар гьазурунин, абур чап авунин ва къуватда гьатунин къайдаяр тестикьарунин гьакъиндай.
4. Муниципальный къуллугъдин сад тир реестр, муниципальный къуллугъар ва муниципальный къуллугъчийриз зегьметдин гьакъи гунин положение тестикьарунин гьакъиндай.
5. Дагъустан Республикадин муниципальный тешкилатрин Советдиз членвилин взносар гунихъ галаз алакъалу тир харжар гунин гьакъиндай.
6. «Сельсовет Герейхановский» хуьруьн поселенидин администрацияди «Мамраш-Ташкапур» автомобилрин рекьин кьве патай мукьвал тир сергьятра чилин законодательстводин ва эцигунрин къайдайрин истемишунрал амал ийизвай гьалдин гьакъиндай.
7. Къазиагьмедов Роберт Абидиновичан тIвар эбеди авунин гьакъиндай.
8. Жуьреба-жуьре месэлаяр.
Сессиядал алай 1-месэладай райондин контрольно-счетный палатадин председатель Къ. Къ. Эскерова гьахъ-гьисаб авуна.
Докладдин винел Эминхуьруьн поселенидин кьил Р. З. Рамазанов, ЦРБ-дин кьилин духтур М. И. Ханбалаев рахана.
2 ва 3-месэлайрай депутатрин Собранидин аппаратдин руководитель Р. А. Абдулазизова информация авуна.
4 ва 5-месэлайрай райадминистрациядин кьилин заместитель-экономикадин управленидин начальник Р. А. Муталибов рахана.
6-месэладай информация Герейхановский хуьруьн поселенидин кьил А. М. Гьажимегьамедова авуна. Анал Роснедвижимостдин сергьятдин районрин уртах комитетдин председатель А. А. Мейланов, райондин эменнидинни чилерин алакъайрин председатель Н. Къ. Алискеров, райадминистрациядин кьилин 1-заместитель М. Гь. Агьмедов ва архитектор Г. А. Гьуьсейнов рахана.
7-месэладай Р. А. Абдулазизова информация авуна.
Сессиядал гьялай месэлайрай талукь къарарар кьабулна (абур чна агъадихъ гузва).
Гьа иналди сессияди вичин кIвалах акьалтIарна.
