И йикъара «Куьредин хабарар» газетдин редакциядиз Хасавюрт шегьердин педколледждин ТОКС- дин командир Агьмедова Гуьзелан ва анин краеведрин кружокдин руководитель Халилулаев Болатханан тIварар алаз са шумуд чар хтана. Абура Ватандин ЧIехи дяведа телеф хьайи, къати женгера иштиракай са шумуд касдикай делилар гъанва. Абурукай са шумуд чаз газет кIелзавайбурун фикирдиз гъиз кIанзава.
1. Мусаев Виктор Азизович, 1926- йисуз дидедиз хьана, Кьасумхуьрелай я. 1944- йисуз Львовдин РВК- ди армиядиз эвер гана. 128- стрельковый дивизиядин 323- стрельковый полкунин составда аваз душмандихъ галаз са шумуд фронтда, гьабурукай яз 4- Украинадин фронтдани, женг чIугуна.
В.А.Мусаевакай 2008- йисуз Махачкъалада акъатай «Солдаты отечества» ктабдани (7- том) делилар ганва.
2. Жигеров Гьажимирзе, 1908- йисуз Кьианрин хуьре дидедиз хьана, Кьасумхуьруьн РВК- ди эвер гана. Жергедин аскер. Дяведилай гуьгъуьнин йисара хайи хуьре производствода кIвалахна.
3. Меликов Нурмегьамед, 1903- йисуз дидедиз хьана, Кьасумхуьрелай я. Женгинин къуллугъдиз Махачкъаладин ГВК- ди 1941- йисан 20- октябрдиз эвер гана. 345- стрельковый дивизиядин штабдин техник- комендант. 1942- йисан сентябрдиз женгина телеф хьана, Кисловодск шегьерда стхавилин сурара кучуднава.
РикIел хуьнин ктабда Сулейман- Стальский (Кьасумхуьруьн) райондай телеф хьанвайбурун жергеда адан тIвар, я адакай маса делилар авач.
4. Гьажибабаев Шихбала, 1916- йисуз дидедиз хьана, Курхуьрелай я. 1940- йисуз Кьасумхуьруьн РВК- ди женгинин къуллугъдиз эвер гана. Ватандин ЧIехи дяведин йисара 247- стрельковый дивизияда политрук яз къуллугъна.
Женгинин наградайрал, гуьгъуьнилай кIвалахдайла, Зегьметдин Яру Пайдахдин орденни алава хъхьана.
Чи газетдин редакциядиз атай чарарай аквазвайвал, Хасавюртдин педколледжда ТОКС- дин кружок кардик кваз гзаф йисар я. Адан членри Ватандин ЧIехи дяведин йисара телеф хьайи, гел галачиз квахьай ва гъалибвал къачуна чеб яшамиш жезвай чкайра ислягь зегьметдив эгечI хъувур инсанрикай делилар кIватIзава. Абур педколледжда ачухнавай музейда хуьзва.
- Гьуьрметлу редакция! – кхьизва эхирдай Г.Агьмедовади ва Б.Халилулаева,- винидихъ тIварар кьунвай инсанрикай куьруь делилар газетдиз ракъуруналди, чаз абурун ирссагьибри, мукьва- кьилийри, абур чидайбуру чаз алава делилар ракъурнайтIа кIанзавай. Лугьудайвал, гьич са касни, гьич са затIни рикIелай ракъурун лазим туш.