Алатай жуьмя юкъуз, чи республикада фадлай хъсан адет хьанвай сад тир политинформациядин йикъан сергьятда аваз, райондин активдихъ галаз гуьруьшмиш хьун патал чи райондиз ДР-дин государстводин хсусият идара авунин рекьяй министр Юсуфов Раюдин Айдакьадиевич мугьман хьана.
Райадминистрациядин заседанийрин залда кьиле фейи и гуьруьшмишвал, республикадай атанвай багьа мугьман тебрик авуналди, муниципальный райондин Кьил Яралиев Имам Музамудиновича ачухна ва адаз сифте гаф гана.
Р. А. Юсуфова вичин суьгьбет 9-июлдиз сифте яз чи республикадиз Россиядин Федерациядин Президент Д. Медведев мугьман хьуниз, ада тухвай кIвалахдин нетижайриз, РФ-дин Хатасузвилин Советдин выездной заседанидал гьялай месэлайриз, и гуьруьшмишвилерин нетижада Дагъустан 2020-йисалди вилик тухунин стратегиядин проектда къарагъарнавай, гьакIни Дагъустан экономикадин ва социальный жигьетдай вилик тухунин месэлайриз ва алай йисан сад лагьай паюна къазанмишнавай агалкьунриз талукьарнавай. Эхирдай ада залда авайбурун патай атай са жерге суалриз тамам жавабар вахкана.
Ихьтин метлеблу суьгь-бетдай ва вахкай жавабрай И. М. Яралиева вичин ва гьакIни вири районэгьлийрин патай чи къунши тир стха халкьдин векил Р. А. Юсуфоваз чухсагъул лагьана ва адавай и гуьруьшмишвилин вахтунда анал къарагъарай бязи месэлаяр гваз республикадин руководстводин вилик экъечIун тIалабна.