Аялар чи гележег я, абурун вилерай чаз дуьнья аквазва. Бубайрихъ гзаф мисалар авай: «Аял авачир кIвални кьий, яд галачир регъвни», «Аялри кьуьзуь тавур диде-буба гьич садрани кьуьзуь жедач». Амма аялар вири сад туш: садбуру чпин акьулдалди, хъсан хесетралди ва дерин чирвилералди диде-бубайрал баркалла гъизва, муькуьбуру лагьайтIа, чIуру ниятралди, чиркин кIвалахралди - лянет гъизва. Алай девирдин аялар лап гьа девирдив кьадайбур я. Куьрелди, гилан аямдин аялар чеб-чпин иесияр хьанва. Масада лагьай акьуллу ихтилат, къалурай дуьз рехъ - абурун кьиле гьатзавач. Месела, къачун чна школайра кIелзавай аялар. Эгер абурукай са паюни кIелайтIа, муькуь пай гьакI вахт акъудиз къвезвайди я. Ктабар, тетрадар, сумкаяр школадиз гъун мудда амач. Компьютерар, телевизорар хьайила, аялриз кIелун герек къвезмач.
Фикир гайила,-диде-бубайри аялар чпин кьамал акьадарнава. Зегьметдин къадир авачиз вердишарзавай аялдиз: кепекдин къадир гьикI чир хьурай?!
Мадни, хъсан пек-партал, багьа телефонар, жибинда гьамиша пул хьайила, гьи аялди кIелда!? Гьелбетда, садани. Пуд лагьайди, кIвалахдин гъиляй диде-бубайри аялрал гьич са гуьзчивални тухузвач. Эгер муаллимди аялдилай арза авуртIа, вири тахсирар муаллимрин хиве твазва. Садра кьванни ихьтин вахтунда, диде-бубайри чпин аялар школада квел машгъул ятIа ахтармишна кIанда, белки, гьа чIавуз хьайитIани абуруз чпин аялри вуч ийизватIа, ачухдаказ акван.
Диде-бубайри кIандайвал авурла, са бязи аялар чеб-чпин ихтиярда гьатзава.
Алай вахтунда и месэла гзаф важиблубурукай сад я, Эгер чаз чи аялрихъ хъсан акьул ва бахтлу гележег хьана кIанзаватIа, абур чна дуьз тербияламишна, зегьметдин къадир аваз вердишарна кIанда.
Къуй Аллагьди чаз чи аялар ватанпересвилелди тербияламишдай къуватар гурай!
