Тербиядин маса хилерихъ галаз сад хьиз, акьалтзавай несил чи бубайрин баркаллу крариз вафалубур яз тербияламишунин патал ватанпересвилин тербиядиз чи уьлкведа гьамишанда кьетIен фикир гуз хьайиди я ва гилани гузва. Уьлкведин къудратлувал адан халкьдилай гзаф аслу я.
Амма эхиримжи йисара, Советрин девирдив гекъигайла, ватанпересвилин тербия са тIимил зайиф хьанва. И кардиз йисалай-суз кьетIен фикир гун герек я, иллаки 23-февралдин вилик квай йикъара.
8-февралдиз Курхуьруьн 2-нумрадин юкьван мектебда, аялрин, муаллимрин активвал аваз, хъсан мярекат кьиле тухвана. Ам фашизмдиз акси хьайи жегьил игитриз, гьа са вахтунда алукьзавай сувар тир Ватан хуьзвайбурун Йикъаз талукьарнавайди тир. Мярекатдиз мектебдин старший пионервожатый Саругъланова Гьуьруьхалума 6-7-классрин аяларни галаз вири патарихъай хъсан гьазурвал акунвай.
Залдин цларал, аквадай чкайрал, Ватандин игитар тир пионеррин, комсомолрин портретар, шикилрин монтажар, гъвечIи, амма таъсирлу эвер гунар кхьенвай лозунгарни алкIурнавай.
Залдиз вири кIватI хьайила, абурун вилик Гь. Саругъланова рахана, мярекатдин метлебдикай, антифашистдин югъ мус, гьина арадиз атанайтIа, къенин школьникар патал адакай ва Ватан хуьзвайбурун суварикай гьихьтин метлеб аватIа суьгьбетна.
Ахпа сегьне мярекат кьиле тухун патал 9-классдай тир Къагьриманова Дианадин ва Шайдаева Адиятан ихтиярда вугана. Абуру герен-герен вилик экъечIиз, мярекатдиз талукь рахунар авуна, эвер гунар, шиирар кIелна. Анал чкайрилай къарагъиз, сегьнедал экъечIиз, Гьуьсейханова Заиради, Радмила ва Мария Мегьамедоври, Эмирханова Ирадади, Шерифова Аминади, Мирзоева Эмиляди таъсирдай гафар лагьана, «Диде», «Миша Шабанов» ва маса шиирар кIелна, жегьил игитар рикIел хкана, абурун игитвилерикай лагьана.
Эхирдай анал рахай мектебдин директор, ДР-дин халкьдин муаллим Н. Алхасова, Ф. Гьажиевади и цIарарин авторди хъсан мярекат тешкилай аялриз, старший пионервожатый Гь. Саругълановадиз чухсагъул малумарна, мярекат бегенмиш хьайиди, ада аялрик ватанпересвилин руьгь кутурдини къейдна.
Райсудин Набиев, муаллим.