Марсель Бабаева Эминхуьруьн юкьван школада 7-классда хъсан къиметар аваз кIелзава, анин общественный уьмуьрда активвилелди иштиракзава. Гьа са вахтунда, ада 2012-йисалай хуьруьн ДЮСШ-да Къазахстан Республикадин лайихлу тренер, спортдин мастер Абдулнасир Мегьамедкеримован гъилик азаддаказ къуршахар кьунай вердишвилер къачузва ва вичин устадвал хкажзава.
Ингье, зи вилик М. Бабаева 2013-2015-йисара турнирра къачунвай медалар, кубокар, Гьуьрметдин грамотаяр, дипломар (абурун кьадар 20-далай артух я.) ква. Абурай аквазвайвал, Марсела 3 сеферда Эминхуьруьн ДЮСШ-дин, 2 сеферда райондин кIвенкIвечивал патал тухвай акъажунра 1-чкаяр, Дагъустандин халкьдин шаир СтIал Сулейманан приз патал спартакиададин гьисабдай Кьасумхуьрел, гьакIни Мегьарамдхуьре, Дербентда, Ахцегьа тухвай зональный акъажунра 2-чкаяр кьуна, ДР-дин образованидин ва илимдин министерстводи республикадин кIвенкIвечивал патал школьникрин арада тухвай акъажунра иштиракна.
Алатай йисуз Марсель Бабаева Къазахстан Республикадин Актау шегьерда вад уьлкведин, гьа гьисабдай яз Россиядин субъектрай тир кьуд командадин спортсменрин арада кьиле фейи международный турнирда иштиракна, ана 42 килограммдин заланвиляй приздин 3-чка кьуна. Марселаз медаль, 3-дережадин диплом ва «Лап хъсан техника къалурунай» махсус приз гана.
Алай йисан январдин вацра М. Бабаева Дербент шегьерда ва Эминхуьре школьникрин арада тухвай акъажунрани 1-чкаяр кьуна.
- Чи гьар йикъан тренировкайри къалурзавайвал, Марселан рикI къуршахар кьунал гзаф ала, - лугьузва Абдулнасир Мегьамедкеримова. – Умудлу я, адахъ гележегда мадни хъсан нетижаяр жеда.
Хазран Кьасумов.
Шикилда: М. Бабаев.