8-февралдиз райадминистрациядин заседанийрин залда райадминистрациядин активдин совещание хьана. Ам муниципальный райондин Кьил Нариман Шамсудинович Абдулмуталибова ачухна ва кьиле тухвана.
Совещанидал Дагъустан Республика вилик тухунин кар алайбурукай сад тир «Обеление экономики» проект уьмуьрдиз кечирмишунин нетижайрикай, гьакIни 2015-йисуз муниципальный райондин сергьятда агьалияр формальныйдаказ тушиз кIвалахдал машгъул хьун тIимиларунин гьакъиндай месэлайриз килигна.
Совещанидин кIвалахда райондин администрациядин Кьилин 1-заместитель Лацис Оруджева, заместитель Саид Темирханова, райадминистрациядин къурулушдин подразделенийрин ва федеральный идарайрин руководителри, хуьрерин поселенийрин администрацийрин кьилери, общественностдин ва СМИ-рин векилри иштиракна.
Совещание ачухдайла муниципалитетдин Кьил Н. Ш. Абдулмуталибова къейд авурвал, налоговый политикадин важиблу месэла налог эцигзавай база мягькемарун, чилин участкайрин ва капитальный эцигунрин объектрин гьакъиндай делилар галай-галайвал актуализация авун я.
Совещанидал алай месэлайрин гьакъиндай анал гегьенш информация гваз МР-дин администрациядин экономикадин отделдин начальник Вагьабова Саният рахана. Ада къейд авурвал, кар алай (приоритетный) проектдин важиблу хилер – эменнидин ва чилин налогрин жигьетдай налоговый база мягькемарунин, физический ксарин эменнидилай къвезвай, гьакIни чилин налогрин такьатрин кьадарар артухарунин, гъвечIи ва юкьван карчивилел машгъул ксар налоговый учетдиз къачунин нетижада бюджетдиз алава яз 999 агъзур манат пулунин такьатар атана. ДР-да авай Росреестрдихъ галаз санал чилер менфятлудаказ ишлемишунин жигьетдай муниципальный контроль кьиле тухун яз 110 ахтармишунар авуна. Нетижада 86 кас жавабдарвилиз чIугуна, жермейрин кьадарди 185 агъзур манат тешкилна.
Совещанидал малум хьайивал, хуьрерин поселенийрин администрацийрин работникри кIвалба-кIвал ахтармишунар тухвайла эцигна куьтягь тавунвай 106 объект малум хьана. Асул гьисабдалди абур алай вахтунда ишлемиш тийизвай яшайишдин дараматар я.
Докладчиди къейд авурвал, муниципальный райондин рабочий группади гъвечIи карчивилин субъектрал инсанар кIвалахдалди таъминарунин жигьетдай кIвалах гузвайбуру кIвалах ийиз кьунвайбурухъ галаз зегьметдин икьрарар кутIуннаватIа чирун патал ахтармишунар кьиле тухвана. Нетижада 1532 ихьтин ксар малум хьана. Ида тайинарнавай тапшуругъдин (план 1319 кас) 116% тешкилзава.
Формальныйдаказ тушиз кIвалахдал машгъул тир 271 касдихъ галаз зегьметдин икьрарар кутIунна, гьакIни агьалийрихъ галаз гъавурда тунин кIвалах тухвана.
Совещанидал алай месэлайрай анал чпин фикирар ва са бязи делилар гваз экономикадин ва финансрин рекьяй райадминистрациядин кьилин заместитель Саид Темирханов, ФОМС-дин ДР-да авай отделенидин районрин уртах филиалдин директор Руслан Гьажимурадов, ДР-дин Пенсионный Фондунин Сулейман-Стальский районда авай управленидин начальникдин заместитель Назир Кьасумов, С.-Стальский районда авай ЦЗН-дин директор Назир Абдулгьамидов, ФНС-дин ДР-да авай 2-нумрадин МРИ-дин начальникдин заместитель Эльбрус Гьажиев, гьакIни Кьулан СтIалрин, Алкьвадрин, ЦIийи Макьарин хуьрерин поселенийрин кьилер тир Муслим Альдеров, Нурали Эмрягьов, Асамудин Къазиагьмедов ва маса юлдашар рахана.
Совещанидин кIвалахдин нетижаяр кьунихъ галаз санал МР-дин Кьил Н. Ш. Абдулмуталибова и важиблу месэладай ведомствойрин уртах саналди тир кIвалах менфятлуди авун, вахт-вахтунда умуми рейдерин йикъар кьиле тухун меслят къалурна.
Гьа иналди совещаниди вичин кIвалах акьалтIарна.
А. Камилов
