Терроризм лугьудай завалди дуьньядин гзаф уьлквейра кьил хкажнава. Ада обществодиз, инсанриз гузвай зарар зурбади я. Терроризмдиз ва экстремизмдиз акси яз къайдаяр хуьдай ва гуьзчивалдай органри, чкайрал тешкилнавай терроризмдиз акси комиссийри, общественный тешкилатри, массовый информациядин такьатри тайин кIвалах тухузва.
Дагъустан Республикадин печатдин ва информациядин министерстводин теклифдалди мукьвара республикадин терроризмдиз акси комиссияди «Правильное понимание джихада», «Заблуждения о халифате», «Взаимоотношения мусульман и светского общество», «Отношение мусульман к миру и войне», «Заблуждения одного течения», «Отношение мусульман к иным конфессиям», «Женщина в исламе» ва «Патриотизм в исламе» ктабар чапдай акъуднава.
Ктабра терроризмди вичин кьил къвердавай виниз хкажзавайдакай, ада гзаф уьлквейра инсанар хаталувилик кутунвайдакай , мусурманринни светский обществойрин алакъайрикай, ислам дин терроризмдиз ва экстремизмдиз акси тирдакай гегьеншдиз суьгьбетзава, и крар тестикьарзавай гзаф кьадар мисалар ва делилар гъанва.
- Терроризмдиз акси комиссияди акъуднавай ктабар, анра гьатнавай материалар гьар са касдиз чарасуз герекбур я, - лагьана чаз общественный хатасузвал хуьнин рекьяй райондин администрациядин Кьилин заместитель Гьажиагьмед Гьажиагьмедова. – Ктабар агьалийривай, талукь къуллугъривай ДР-дин терроризмдиз акси комиссиядин ва печатдинни информациядин министерстводин сайтрай, гьакIни районда кардик квай терроризмдиз акси комиссиядай къачуз жеда.
Хазран Кьасумов.