Малум тирвал, ЮНЕСКО-дин къарардалди 21-февраль дидед чIалар хуьдай Югъ яз малумарайдалай нихъ алай йисуз 16 йис алатзава.
Чи районда кардик квай «2012-2020-йисара Сулейман-Стальский райондин сергьятда хайи чIал хуьн ва вилик тухун» муниципальный Программадин бинедаллаз чи районда гьар йисуз дидед чIалаз талукьарнавай конференцияр вини дережада аваз кьиле тухузва. Алай йисан 21-февралдиз ам чи районда 4-сеферда кьиле фида.
27-январдиз муниципальный райондин Кьил Нариман Шамсудинович Абдулмуталибован рабочий кабинетда хайи чIалан конференция кьиле тухунин жигьетдай кардик квай оргкомитетдин тешкиллувилин заседание кьиле фена. Ам Н. Ш. Абдулмуталибова ачухна ва кьилени тухвана.
Малум хьайивал, алай йисуз хайи чIалан конференция лезгийрин «Шарвили» къагьриманвилин эпосдиз талукьарна кьиле фида. Тешкиллувилин са бязи мярекатар (конкурсар, сочиненияр кхьин) райондин образованидин ва культурадин маканра кьиле физва.
Заседанидал и месэладай чпин фикирар ва са бязи теклифар гваз РУО-дин начальник Индира Османова, райондин культурадин отделдин начальник Майрудин Бабаханов, муаллим ва писатель Нажмудин Шихнабиев, райондин агъсакъалрин Советдин председатель Фахрудин-гьажи Османов, райондин ветеранрин Советдин председатель Абдулаким Гьажимурадов, шаир Сажидин Саидгьасанов, райондин ЦБС-дин директор Людмила Мегьамедрасулова, райондин аялрин художественный, музыкальный школайрин, ДДТ-дин директорар тир Ямудин Рамазанов, Къазибег Къурбанов, Мурвет Мелахимов, райадминистрациядин Кьилин 1-заместитель Лацис Оруджев, и цIарарин автор ва маса юлдашар рахана.
Кьилди къачуртIа, абуру чпин рахунра лезги чIалаз гьеле аялар ясли-бахчайра амаз кьетIен фикир гун герек тирди, кьиле тухузвай серенжемарни гьам ясди-бахчада, гьам школада ва культурадин маканрани жезмай кьван лезгидалди кьиле тухун, хзандани хайи дидед чIалал рахун чарасуз тирди, жегьил яратмишунардайбуруз вири жуьредин куьмекар гун чарасуз герек тирди къейдна.
ЧIал хуьн ва вилик тухун патал СМИ-рикайни гегьеншдаказ менфят къачун, конкурсра гъалиб хьайибур руьгьламишдай серенжемар кьабулунни важиблу тирди лагьана.
Заседанидин эхирдай анал рахай муниципальный райондин Кьил Нариман Шамсудинович Абдулмуталибова анал гъайи гзаф теклифрин тереф хвена, са жерге къуллугърин руководителриз тапшуругъар гана, меслятар къалурна.
А. Камилов, оргкомитетдин член.