Герейханован хуьруьн ДЮСШ-ди (директор Гьадис Гьадисов) Чуьхверхуьрел армспортдай филиал ачухна 10 йисалай виниз я. Ана Россиядин, Европадин ва дуьньядин чемпион, РФ-дин лайихлу тренер Малик Тагьирбегован гъилик спортдин и жуьредай вердишвилер къачузвай ва чпин устадвал хкажзавай жегьилри республикада, адалай къеце кьиле тухузвай Вирироссиядин ва международный турнирра, чIехи дережадин чемпионатра агалкьунар къазанмишзава. Мукьвара и филиалдай тир 25 спортсменди Дербент шегьерда абсолютный категориядай Дагъустанда сад лагьай чемпион, РФ-дин спортдин мастер Ш. Ш. Омарован призар патал республикадин кIвенкIвечивал патал тухвай акъажунра иштиракна.
Малик Тагьирбегова чаз лагьайвал, акъажунра республикадин шегьеррайни районрай атанвай 20 командадик кваз 200-далай виниз спортсменри иштиракна. Абурун арада неинки республикадин, гьакIни Россиядин, дуьньядин чемпионарни призерар авай. Гьавиляй спортсменрин арада акъажунарни къизгъиндаказ кьиле фена.
Чуьхверхуьруьн филиалдай тир Равил Тагьирбегова, Сеймур Тагьирова, Агьмед Къурбанова, Эрзиман Алисултанова (70 килограммдин ва абсолютный категорийрай), Ризван Мегьамедова, Мегьамедрасул Сеферкъулиева, Агьмед Агьмедова, Гьасан Мегьамедханова, Билал Магьмудова 1, Мегьамедкьасум Таривердиева, Низам Къурбанова, Алибег Таривердиева, Эмир Ибрагьимова, Радим Таривердиева, Мегьамед Эмирагъаева ва Рашид Яралиева 2 ва 3-чкаяр кьуна. Абуруз медалар, дипломар, къиметлу пишкешар гана.
- Винидихъ рахай турнирда 1-чкаяр кьур спортсменри гила Москвада Россиядин кIвенкIвечивал патал тухудай акъажунра иштиракда, ана тафаватлу хьайибур Болгарияда кьиле фидай дуьньядин чемпионатдиз фида, - лугьузва М. Тагьирбегова. – Чи къаст анрани агалкьунар къазанмишун я.