Мукьвара Эминхуьре кардик квай «Аллахвердиев» лежбервилинни фермервилин майишатдин (КФХ-дин) механизатор Гьажимет Аллагьвердиев Дагъустан Республикадин Гьукуматдин Гьуьрметдин грамотадиз лайихлу хьана. Наградани адав «Сулейман-Стальский район» муниципальный райондин Кьил Нариман Шамсудинович Абдулмуталибова шад гьалара вахкана (шикилда).
Чкадал фена, Гь. Аллагьвердиевахъ галаз гуьруьшмиш хьайила, зи рикIел Лезги Няметан шиирдин цIарар хтана:
«… Гзаф гудай за ватандиз
хийир,
Гъилер-фяле, рикI – кIвалах
хьанайтIа».
Вич заз фадлай хъсандиз таниш кас яз, завай инанмишвилелди лугьуз жеда хьи, Гьажиметахъ фяледин гъилерни ава, рикIни. Мадни, ам кIвалахдихъай, четинвилерикай кичIе кас туш.
Малум хьайивал, КФХ вичин хзанни галаз тежрибалу агроном Алимет Аллагьвердиева тешкилна. Адан кIвачихъ бегьердал атанвай 5 гектар ва 2014-йисуз кутунвай 3 гектар уьзуьмлухар гала. Анагар чешнелу гьалда ава. КIватI хъийизвай бегьердал гьалтайлани лежбервилин майишат районда вилик жергейра авайбурукай сад я. ИкI, 2015-йисуз КФХ-ди бегьердал атанвай уьзуьмлухрин гьар са гектардай 180 центнер ципицIар кIватI хъувуна. И агалкьунрик Гьажиметан зегьметдин еке пай ква. Ада вичив гвай «МТЗ-82» маркадин трактордалди уьзуьмлухра жергейрин араяр цазва, анриз культивация ва азарринни зиянкар гьашаратрин аксина дарманар язава, атIай ципицIар дашмиш хъийизва ва жуьреба-жуьре маса кIвалахар тамамарзава.
КIвалахдин 18 йисан тежриба авай механизатор хьиз, Гь. Алагьвердиев уьзуьмлухриз ятар гудай, тегьенгрин кьурай ва герек авачир хилер атIудай, абурун пунариз пер ядай халис устад, лежбер итимни я.
Гьажимет Аллагьвердиевахъ галаз ихтилатар ийидайла, за ихьтин са кардизни фикир гана. Эхиримжи йисара районда инвестиционный проектар кардик акатунал, кьилдин ксари лежбервилинни фермервилин майишатар, ЛПХ-яр тешкилунал, цIийи багъларни уьзуьмлухар кутунал ада шадвал, разивал ийизва. Ада гьисабзавайвал, ихьтин кIвалахри райондин экономика мягькемаруниз, гьасилзавай продукциядин кьадар артухаруниз, инсанриз кIвалахдай чкаяр яратмишуниз куьмекзава. Мадни, Гь. Аллагьвердиева лугьузвайвал, менфятлу чилер баябан яз, гадарнаваз тунни дуьз кар жезвач.
Гаф авач, дуьз фикир-хиял ийизва чилин къадир авай касди.
- Гьажимет кIел тавунвай агроном я лагьайтIа, зун кIусни ягъалмиш жедач, - лугьузва райондин хуьруьн майишатдин отделдин начальник Мегьамедзагьид Бабаева. – Уьзуьмлухрихъ дуьз къайдада гелкъуьнин сирерни ада саки 30 йисуз «Аламишинский» совхозда уьзуьмчивилин бригададин бригадирвиле ва старший агрономвиле кIвалах авур вичин дах Алиметавай къачуна. Мисалда лугьузвайвал, ич ичин тарцивай яргъаз аватдач. Гьажиметакайни вичин дах хьтин гъавурда авай уьзуьмчи хьанва.
Са рахунни алачиз, зегьметкеш итим тир Гьажимет Аллагьвердиев ганвай наградадиз лайихлуни я.
