Дагъустан Республикадин Кьил Рамазан Абдулатипован Указдалди «Сулейман-Стальский район» муниципальный райондин «Зардиян» ООО-дин кьилин агроном Алимирзе АГЪАМИРЗОЕВАЗ 2013-йисан октябрдин вацра «Дагъустан Республикадин хуьруьн майишатдин лайихлу работник» лагьай тIвар гана. ЧIехи наградани адав Къизляр районда «Чуьлдин югъ» тIвар алай республикадин хуьруьн майишатдин пешекаррин мярекат-выставка тухудайла вахканай.
Эминхуьряй тир Алимирзе Агъамирзоев ихьтин чIехи тIварцIиз куь лайихлу авуна?
И суалдиз куьрелди ва са гафуналди жаваб гуз жеда: зегьметди.
Лагьана кIанда, жуван хуьруьнви яз, А. Агъамирзоев заз мукьувай чиз гзаф йисар я. Са вахтара чаз хуьруьн майишатдин производствода санал кIвалахдай мумкинвални хьанай.
Алимирзе Агъамирзоев 1960-йисуз ЦицIе хуьре дидедиз хьана. Яргъал йисара алишверишдин хиле кIва-лах авур Жамалан ва 45 йисуз производствода зегьмет чIугур Секинатан гзаф аялар авай хзанда чIехи хьайи Алимирзедиз зегьметдин дад, чилин къадир гьеле школада амаз чир хьана: ада 4 йисуз школадин аялрин произ-водственный бригадада кIвалахна.
Тульский областдин Богородецкий шегьердин хуьруьн майишатдин техникумдин агрономический отделение акьалтIарай А.Агъамирзоева 10 йисуз совхозда уьзуьмчивилин бригадада бригадирвиле кIвалахна. И йисара 55 гектарда цIийи уьзуьмлухар кутуна. Гьар са гектардай 80-110 центнер ципицIар кIватI хъувун бригададиз адет хьанвай кар тир. Кьве йисуз республикадин уьзуьмчивилел машгъул жегьилрин бригадайрин арада 3-чкаяр кьуна.
КIвалахда хъсан нетижаяр жезвай, чилин къадир ва тешкилатчивилин алакьунар авай А. Агъамирзоева 2 йисуз совхозда кьилин агрономвиле ва са шумуд йисуз кьилин зоотехниквиле кIвалахна.
2006-2007-йисарилай эгечIна чи райондани хуьруьн майишат кIвачел ахкьалдариз, уьзуьмлухринни багъларин, техил гьасилзавай никIерин майданар артухариз башламишна, хуьруьн майишатдихъ галаз алакъалу программаяр, проектар кардик кутуна. Яваш-яваш цIийи жуьреда кIвалахзавай карханаяр, инвесторрин майишатар арадал атана. Ихьтин карханайриз хъсан пешекаррин игьтияжни хьана. Тежрибалу агроном Алимирзе Агъамирзоеваз 2008-йисуз районда цIийиз тешкилнавай «Зардиян» ООО-диз кIвалахал теклифна. Гьа йисалай Алимирзе Жамаловича и карханада кьилин агрономвиле кIвалахзава. Ана гьар йисуз жезвай хъсан нетижайрик, агалкьунрик тежрибалу агрономдин зегьметдин еке пайни ква.
- «Зардиян» ООО гзаф хилерин кархана я, - лугьузва А.Агъамирзоева. - Кьилди къачуртIа, чахъ 185 гектар уьзуьмлухар, 20 гектар багълар, магьсулрин никIер, цементдинни ракьун даяхар акъуддай цех, алай аямдин техникадалди таъмин тир мехпарк ава. Карханада 50-60 кас пешекарри, рабочийри ва механизаторри зегьмет чIугвазва.
Чаз акурвал, карханадин уьзуьмлухра, багълара хъсан къайда ава. Инал-анал рабочийри ял ядай, фу-затI недай, къулайвилер авай чкаяр туькIуьрнава, рабочияр хуьрерай кIвалахал махсус автобусда аваз гъиз-хутахун тешкилнава.
Мукьвал йисара уьзуьмлухар кутун патал 100 гектар чил гьазурнава, 10 гектарда Ставропольский крайдай гъана тумунин къуьл гьасилун патал цанва.
- Алимирзе Жамалович хъсан чирвилер, кIвалахдин тежриба авай ва кIвалах алакьдай, цIийивилерихъ къекъвезвай пешекар-агроном я, - лугьузва райондин хуьруьн майишатдин ва суьрсетдин управленидин начальник Мегьамедзагьид Бабаева. - Ада зегьмет вичин уьмуьрдин игьтияждай кьазва, зегьметди арадал гъайи хъсан нетижайри адан руьгьдиз секинвал, рикIиз шадвал гузва. Ам ганвай тIварцIиз, тариф авуниз лайихлу инсан ва пешекар я.
Алава хъийиз кIанзава хьи, чилин къадир авай, халкьдин суфра девлетлу авун патал зегьмет чIугвазвай хъсан пешекар хьиз, Алимирзе Жамалович хуьре-кIвале гьуьрмет авай низамлу хизандин кьилни я.
