Акъатзавай литературадин йис райондин администрациядин къарардалди чIехи камалэгьли, сифтебурукай яз Дагъустандин тарих галай-галайвал кхьена «Асари Дагъустан» вичин халкьдал агакьарай Гьасан эфенди Алкадаридин 180 йис тамам хьунихъ галазни алакъалу авунва. Им шак алачиз вири лезгийриз шадвал ганвай, литературадал, санлай къачурла, чи эдебиятдал рикI алайбур гьевесламишнавай карни хьанва.
И важиблу кардихъ галаз алакъалу яз, культурадин маканра хьиз, мектебрани гьар жуьредин шадлу мярекатар тешкилзава, аялриз ва жаванриз вуч кас тиртIа Гьасан-эфенди Алкадари мадни дериндай чирзава.
Ингье и йикъара Курхуьруьн 2-нумрадин юкьван мектебдин 7-классдин аялрихъ галаз Гьасан-эфендидин уьмуьрдиз талукьарнавай конференция тухвана. 7-класс ина хъсанбурукай сад я. Ам тешкилайди и классдин руководитель, ДР-дин лайихлу муаллим Ферида Нажмудиновна я. Конференцияда муаллимрини иштиракна. Иштиракчийрин вилик Ферида Нажмудиновнади Гьасан-эфендидин уьмуьрдикай, адан яратмишунрикай метлеблу суьгьбетна, адан суьретар, ктабар къалурна, абуруз баянар гана.
Конференциядал и цIарарин авторни рахана. Ада Гьасан-эфендидикай лугьунихъ галаз сад хьиз, и камалэгьлидикай вичикай хьиз адан ирс давамарзавай адан невеяр тир дуьньядиз машгьур хьанвай зурба философ Абдусаламакай, рагьметлу Ибрагьимакай, писатель ва муаллим Гьуьсейн Гьуьсейновакай, абурун баркаллу крарикайни лагьана. Аялри чпи интерес ийизвай хейлин суалриз муаллимри тамам жавабарни вахкана.
Конференция вичин метлебдив агакьна, иштиракчийриз ам бегенмиш хьана. Аялри чпи Гьасан-эфендидин насигьатар кьилиз акъудун яз хъсандиз кIелдайди, ахлакь мягькемардайди, обществодиз хийирлу крара активвал артухардайдини хиве кьуна.
Райсудин Набиев, зегьметдин ветеран, муаллим.