Алай йисан 12-ноябрдиз Москвада «Сад тир Россия» Вирироссиядин политический партиядин Председатель Дмитрий Анатольевич Медведеван инициативадалди «Сад тир Россиядин» чкадин отделенийрин секретаррин форум кьиле фена. Адан кIвалахда, Дагъустандин делегациядик кваз, и партиядин чкадин отделенидин секретарь, чи муниципальный райондин Кьил Нариман Шамсудинович Абдулмуталибовани иштиракна.
А форумдал 7-сеферда эвер гузвай РФ-дин Госдумадин депутатарвиле, гьакIни регионрин гьукумдин законодательный органриз депутатарвиле кандидатар яз къалурун патал кандидатураяр тайинарунин жигьетдай виликамаз умуми федеральный партийный сесер гуниз гьазурвилер аквазвай ва гьакIни коррупциядиз акси закондин истемишунар кьилиз акъудзавай гьалдиз килигна.
Анай хтайла Н. Ш. Абдулмуталибова къейд авурвал, и форум «Сад тир Россиядин» жуьреба-жуьре регионрин чкадин отделенийрин секретарриз сад-садахъ галаз таниш жедай, герек тир суалриз жавабар жагъурдай, чкайрал кIвалах мадни менфятлуди авун патал сада-садан тежриба чирдай майдандиз элкъвена.
Форум кьве паюникай ибарат тир: йикъан сад лагьай паюна гьуьжет алай месэлайрай ачух рахунар кьиле фена, гуьгъуьнлай кьилин пленарный заседание хьана.
Райондин Кьили къейд авурвал, ихьтин къайдадин гуьруьшвал сифте яз кьиле фена. Форумдин эхирдай анал регионрин векилрин ва Госдумадин депутатрин вилик экъечIна Дмитрий Медведев рахана. Вичин рахунар ада тебрикдин гафарилай башламишна ва чкадин отделенийрин секретарар агьалийрин вилик акъвазнавай важиблу месэлайрин гъавурда авай, алакъаламишзавай эвез тежер гьалкъа тирди, абуру чпин къуватар «Сад тир Россияди» вичин хивез къачунвай мажбурнамаяр ян тагана кьилиз акъудунал желб авун чарасуз тирди лагьана.
Ада къейд авурвал, алай йисан 1-декабрдиз и партия тешкилна 14 йис тамам жезва. И юкъуз вири уьлкведа, гьа гьисабдай чи райондани «Сад тир Россиядин» агьалияр кьабулзавай вири общественный чкайри кIвалахда.
Ингье, гьеле гила амаз чкайрал алай партийный организацийра 2016-йисан февралдин вацра кьиле фидай партиядин съезддиз делегатар хкядай регионрин конференцийриз гьазурвилер аквазва.
Виликамаз сесер гудай кандидатрин вилик са жерге истемишунар эцигзава: яш 21 йисалай виниз хьун, дустагъдик акат тавун (гьакI алатнавай дустагъни кваз), къецепатан уьлквейра активар (пул, эменни) тахьун. Гьар са кандидатди халкьдин вилик экъечIна рахунра, гьуьжетра иштиракна кIанда ва халкьдин интересар Госдумада хуьниз вич лайихлу тирди субутарна кIанда.
2016-йисан 22-майдиз вири Россияда виликамаз сесер гунин умуми федеральный процедура кьиле фида. Анал 2016-йисан сентябрдин вацра Государственный Думадиз депутатар хкядай сечкийриз къалурдай кандидатураяр тайин жеда.
Умудзава, и кардихъ галаз алакъалу яз вири агьалийривай чпин фикирар лугьуз ва лайихлубур хкягъиз жеда, - лагьана Н. Ш. Абдулмуталибова.
