«Сулейман-Стальский район» муниципальный райондин Кьил Нариман Шамсудинович Абдулмуталибов и йикъара Дагъустан Республикадин диндин организацийрин векилрихъ галаз гуьруьшмиш хьана. Гуьруьшда Кьиблепатан террриториальный округда Дагъустан Республикадин Муфтиятдин векил Магди-гьажи Абидова, Дагъустандин гуманитарный институтдин ректордин куьмекчи, Дагъустан Республикадин намусдин азадвилин ва диндин организацийрихъ галаз кIвалах тухунин Комитетдин векил Мухаммадхабиб Тажудинова, Муфтиятдин векил Сулейман-гьажи Тагъибекова, «Ас-салам» газетдин векил Абдулсабир Агьмедова, гьакIни хатасузвал хуьнин рекьяй райондин администрациядин Кьилин заместитель Гьажиагьмед Гьажиагьмедова, райондин имамрин Советдин председатель Гуьсейн-гьажи Алискендарова, райондин информационный агентстводин руководитель Жабраил Асланова иштиракна.
Райондиз атанвай мугьманар тебрик авунихъ галаз санал, Нариман Шамсудинович Абдулмуталибова абуруз районда авай общественно-политический гьаларикай, диндин месэлайрикай гегьеншдиз суьгьбет авуна.
- Зи фикирдалди, эхиримжи вахтара районда террориствилин рекьяй гьалар къизгъин хьун - им райондин агьалийриз, иллаки жегьилриз диндин рекьяй лазим кьадар чирвилер тахьунихъ галаз алакъалу я, - къейдна Н. Ш. Абдулмуталибова. - Гьавиляй республикадин Муфтиятдинни райондин имамрин Советдин арада алакъа мадни мягькемарун чарасуз я. Ида жегьилриз диндин рекьяй дуьз чирвилер къачуниз, акьалтзавай несил руьгьдинни ахлакьдин жигьетдай тербияламишуниз куьмек гуда.
Н. Ш. Абдулмуталибовахъ галаз кьиле фейи гуьруьшдилай гуьгъуьниз Махачкъаладай атанвай республикадин диндин организацийрин векилар райондин Культурадин Дворецда хуьрерин мискIинрин имамрихъ, школайрин директоррихъ ва чIехи классра кIелзавай аялрихъ (абурун кьадар 500-далай виниз тир) галаз гуьруьшмиш хьана. Лагьана кIанда, аялрин гъилера «Аялар террордиз акси я», «Дагъустан - терроризм галачиз», «Чаз ислягьвал кIанда», «Терроризм завал я», «Ислягьвилиз - эхь, террордиз - ваъ» ва ихьтин маса гафар кхьенвай лозунгар, плакатар авай.
Мярекат башламишдалди вилик заз Дагъустандин гуманитарный институтдин ректордин куьмекчи Мухаммадхабиб Тажудиновахъ галаз гуьруьшмиш жедай мумкинвал хьана.
- Къенин гуьруьш чна Дагъустан Республикадин Гьукуматди тестикьарнавай «20I5-йисуз Дагъустан Республикада терроризмдин идеологиядиз акси акъвазунин комплексный программа» ДР-дин государстводин программа ва «Ислягь Дагъустан» марифатдин проект уьмуьрдиз кечирмишун яз кьиле тухузва, - лагьана чаз М. Тажудинова. - Адан тешкилатчиярни республикадин Гьукумат, ДР-дин намусдин азадвилин ва диндин организацийрихъ галаз кIвалах тухунин Комитет, жегьилрин крарин рекьяй министерство, ДР-дин Муфтият ва гуманитарный институт я. Адан метлебни акьалтзавай несилдиз ахлакьдинни руьгьдин тербия гуникай, Дагъустандин культурадинни тарихдин ирс пропоганда авуникай, терроризмдин вилик пад кьуникай ибарат я. Ихьтин гуьруьшар республикадин диндин организацийри маса районра ва шегьеррани тухузва.
Мярекатдал Мухаммадхабиб Тажудинова «Ислягь Дагъустан» марифатдин проектдикай, Магди-гьажи Абдиева ИГИЛ-да арадал атанвай къизгъин гьаларикай, Сулейман-гьажи Тагъибекова ва Абдулсабир Агьмедова Дагъустан Республикада, санлай уьлкведа ислягьвал хуьн ва мягькемарун патал ислам дин дуьз чир хьунихъ авай метлебдикай маракьлу докладар авуна, абуру хуьрерин имамрин ва школьникрин патай хьайи суалризни тамам жавабар гана.
Хатасузвал хуьнин рекьяй райондин администрациядин Кьилин заместитель Гьажиагьмед Гьажиагьмедова райондиз мугьман хьунай, метлеблу гуьруьш тухунай республикадин диндин организацийрин векилриз рикIин сидкьидай чухсагъул малумарна ва инанмишвал къалурна хьи, абуру авур рахунри районда ислягьвал мягькемаруниз, акьалтзавай несил марифатдинни ахлакьдин руьгьдаллаз тербияламишуниз куьмек гуда.
Хазран Кьасумов.
Шикилра: республикадин диндин организацийрин векилар Н. Ш. Абдулмуталибова кьабулнава; абур школьникрихъ галаз гуьруьшмиш хьанва.
Шикилар автординбур я.