- Я къари, зун кIвалахдилай хкведалди туьквендай са кьве шуьше эрекьни гъваш, верч тукIуна, хинкIарни ая, - лагьана пакамахъ кIвалахал физ гьазур хьанвай Се¬лима.
- Я итим, амай кIвалахарни гьич, эрекь вучтинди я? - мягьтел хьана Айна. - Вуна хъун гадарна 2-3 йисалай гзаф вахт я.
- «Вучиз?», «Хъун гадарна...» гафар ваз герек авач, вуна за лагьайвал ая.
- Валлагь, итим, зун гъавурда акьазвач. КIвализ мугьманар атайлани вуна кIвализ эрекь гъизвайди тушир. Гила вуч хьана? - мягьтел яз жузун хъувуна Айнади.
- Эгер ваз за эрекь вучиз гъваш лугьузвайди ятIа чир хьана кIанзаватIа, за лугьуда. Чаз цIийи бригадир хьанва. Виликан бригадирдиз хьиз, цIийиз хьанвай бригадирдизни за са кьве сеферда кIвализ гъана тIуьн-хъун гуда, ахпа зун адан кьамал акьахда ва кIвалах тийиз адав жуваз пул кхьиз тада.
- Гила зун гъавурда акьуна, итим. Пагь, ваз чидай кьван амалар!...Акъваз, вуж я цIийиз хьанвай бригадир?
- Вини магьледа авай Рачабан гада гачал Гьарун. Вуна, къари, за лагьайвал ая.
ИкI лагьана, лапаткани къачуна, Селим уьзуьмлухриз яд гуз фена.
Ингье, кIвалахдин вахт куьтягь хьайила, бригадир Гьарунни галаз Селим кIвализ хтана. Чин-гъил чуьхвена абур суфрадихъ ацукьна. Вилик верч кьилел алай хинкIар, кьве шуьше эрекь, фу-къафун атана. Селима кьве румкада эрекь цана, сад Гьарунав вугана, сад вичи кьуна. Ада цIийиз хьанвай бригадирдин сагълугъдай тостни хкажна, хуш келимаяр лагьана. И арада кIвализ Селиман кьуд лагьай классда кIелзавай гада Расим хтана.
Вичин бубадихъ галаз суфрадихъ ацукьна эрекь хъвазвай ва кьилин кукIвалай чIар фенвай итим акурла, Расима хабар кьуна;
- Дах, я дах, са кьвед-пудра тIуьн-хъун гана вун кьамал акьахзавай гачал Гьарун гьа им яни?
- Бубайрин мисалда лугьузвайвал, кIвалин хабар гъвечIидавай, хуьруьн хабар чIехидавай чир жеда, - гьакъикъатдин гъавурда акьурла лагьана Гьаруна. - И сеферда вун ягъалмиш хьана, Селим. Зун вуна лугьудай хьтин кьамал акьалдардайбурукай туш, кIвализни зун вун бегьем итим я лагьана атайди я.
Селим гагь бригадирдиз, гагь Расимаз, гагьни чилиз килигиз, чин яру хьана амукьна...
Х. Кьасумов.
