Йикъари гьафтеяр, гьафтейри варцар эвез ийиз, вахтуни виликди еримишда. Ингье, зул алукьнава, ам яваш-яваш тамамвилелди вичин ихтиярда гьатзава. Хуьруьн майишатдин карханаяр, КФХ-яр, арендаторар патал им жавабдар вахтни я – абуру йисан кьиляй-кьилиз кIвалахна арадал гъанвай бегьерар кIватI хъувун лазим я.
Августдин вацран эхирра карханаяр, лежбервилинни фермервилин майишатар ва арендаторар уьзуьмлухрай столовой сортарин ципицIар кIватI хъувунив эгечIнай. И кIвалах абуру са 6-8 йикъан къене акьалтIарна, атIай ципицIар чкайрал муьштерийриз маса гана.
5-сентябрдилай райондин уьзуьмчияр ципицIар кIватI хъувунив массовый къайдада эгечIнава. И кIвалахар кьиле физвай гьал ахтармишун патал зун гзаф майданра уьзуьмлухар авай, и хел вилик тухуник пай кутазвай карханаяр тир «Зардиян», «Гуьлгери вацI», «ЧIереяр» ООО-рин ва Эминхуьре, ЦIийи Макьарал арендаторрин уьзуьмлухриз фена.
Лугьун хьи, карханайра тегьенгрик квай бегьер акурла, гуьгьуьл шад жезва.
Зун Кьулан СтIалрин калун участокда кардик квай «Зардиян» ООО-да ава.
- Гзаф хилерин чи обществодихъ 186 гектар, абурукай яз 155 гектар бегьердал атанвай уьзуьмлухар ава, - лугьузва ООО-дин кьилин агроном, ДР-дин хуьруьн майишатдин лайихлу работник Алимирзе Агъамирзоева. – Алай вахтунда вири къуватар ципицIар пучвилер авачиз ва куьруь са вахтунда кIватIна акьалтIарунал желбнава.
Малум хьайивал, карханада ципицIар кIватI хъувунал гьар юкъуз 55-60 кас рабочияр, атIай ципицIар Дербентдин коньякрин комбинатдиз дашмиш хъувунал 12 машин желбнава. Рабочийри йикъа гьар сада 450-500 килограмм ципицIар атIузва. КIвалахда чешне къалурзавай рабочийрикай яз Э. Агъамирзоевадин, С. Абасмирзоевадин, А. Магьмудовадин, Ш. Рамазановадин, Б. Мирзоевадин ва масабурун тIварар кьаз жеда.
Кьилдин касди тешкилнавай «Гуьлгери вацI» ООО «село Даркушказмаляр» хуьруьн поселенидин территорияда кардик ква. Гьасилзавай бегьердал, кIвалах тешкилунин къайдайрал, уьзуьмлухар авай къайдадал гьалтайла и кархана неинки районда, санлай республикада кIвенкIве авайбурукай ва чешнелубурукай сад я. Ина 126 гектар уьзуьмлухар ава, абурукай 80 гектар бегьердал атанвайбур я.
Алай йисуз карханади 500-550 тонндилай тIимил тушиз ципицIар кIватI хъувун гуьзлемишзава.
Эминхуьруьн мулкуна тешкилнавай «ЧIереяр» ООО жегьил кархана я. Инвестордихъ ана 160 гектарда уьзуьмлухар кутадай фикир ава. Виликан йисара кутур ва «жегьил» хъувур 16 гектардай и йикъара рабочийри ципицIар кIватI хъийизва.
Винидихъ тIварар кьур карханайра хьиз, Эминхуьре ва ЦIийи Макьарал У. Агьмедован, З. Гьамзатован, Э. Агъамирзоевадин, К. Казимбегован ва маса арендаторрин участокрани массовый къайдада ципицIар кIватI хъувунин кIвалахар хъсан тешкиллувал аваз кьиле физва. Халкьдин суфра берекатлу авун, райондин экономика вилик тухун патал гьакъисагъвилелди кIвалахзавай рабочияр акурла, чаз лугьуз кIанзава: «Квез къуватар хьурай, уьзуьмчияр!»
Хазран Кьасумов.
Шикилда: «Зардиян» ООО-да рабочийри атIай ципицIар машиндиз ичIирзава.
