«Жуван халкьдиз,
жуван намусдиз хьиз, вафалу жен...»
Ст1ал Сулейманан
Вичин яратмишунралди хайи халкь ва Дагъустан вири дуьньядиз машгьур авур лезги халкьдин баркаллу хва, чIалан устад, гьамиша жанлу, вахтуниз муьтIуьгъ тежер эсеррин-жавагьиррин сагьиб, зурба камалэгьли, ХХ-асирдин Гомер, Дагъустандин халкьдин шаир СтIал Сулейман дидеди хайидалай инихъ алай йисуз 140 йис тамам жезва. Йисар къвез алатунивай неинки са лезги халкьдин, гьакI Дагъустандин маса миллетрин патайни чIехи арифдардин яратмишунриз ийизвай интерес къвердавай артух жезва. Им тIебии карни я. Вучиз лагьайтIа адан вич яшамиш хьайи девирдин татугай гьалариз бахшнавай ва гьакIни насигьатдин, хци сатирадин, ватандашвилин эсерри алай вахтундани чи руьгьдин истемишунар таъминарзава, абур чи беденри, руьгьдин мелгьем хьиз, кужумзава. Эхь, им гьар са шаирдин еке бажарагъдин лишан я. СтIал Сулейман хьтин бажарагъарни тIебиатди асиррилай садра гузвайди я.
Вичин халкьдиз, вичин намусдиз хьиз, вафалу хьайи шаирдин яратмишунрай чаз ам яшамиш хьайи девир гуьзгуьдай хьиз аквазва. IX-асирда Етим Эмин хьиз, XX-асирда СтIал Сулейманни вичин девирдин намус яз хьана.
Гьавиляй чаз ам сейлини я, играмини. Гьавиляй чIехи шаир яшамиш хьайи адан мемориальный КIвал-музей чи халкьдин пак чкадиз, адан хайи хуьр тир Агъа СтIаларни Дагъустандин шаиррин Меккедиз элкъвенва.
Адан гьуьрметдай гьар йисуз майдин вацра Агъа СтIалдал кьиле тухузвай Сулейманан шииратдин Югъ Дагъустандин поэзиядин Йикъаз, чи халкьарин дуствилин сувариз элкъвезва.
ЧIехи шаирдин гьуьрметдай чна адан 140 йисан юбилей къейдзавай алай йис СтIал Сулейманан йис яз малумарнава. Школайра, культурадин маканра адан уьмуьрдиз ва яратмишунриз талукьарнавай мярекатар кьиле тухузва. Адан тIварцIихъ галаз алакъалу чкаяр ремонтзава, къайдадик кутазва. Шаирдин КIвал-музей ва ам алай чка къайдадик кутун патал республикадин ва гьакIни райондин бюджетрин такьатрин гьисабдай ремонтрин ва аваданламишунин хейлин кIвалахар кьиле тухванва.
Алай вахтунда чун шаирдин юбилейдин мярекат кьиле тухуниз вири патарихъай гьазур хьанва. Амма са карни къейд ийиз кIанзава: 18-майдиз шаирдин 140 йисан юбилейдин мярекат республикада вини дережада аваз кьиле тухунихъ галаз алакъалу яз, чи районда адан юбилейдин мярекат Агъа СтIалдал 19-майдиз кьиле фида.
Гьуьрметлу районэгьлияр, СтIал Сулейманан шииратдал, лезги поэзиядал рикI алай вири юлдашар!
За квез виридаз чи чIехи шаир СтIал Сулейманан поэзиядин сувар рикIин сидкьидай мубаракзава. Къуй чи халкьдин арадай ам дуьньядиз машгьур ийидай, СтIал Сулейман хьтин, баркаллу рухваяр, чIехи бажарагъар мадни акъатрай!
