СтIал Сулейман. Тек и са тIварцIи чи рикIериз гьикьван къуват ва чим гузва! И багьа тIвар кьурла ада чи дамарра ивидин гьерекат йигинарда, чав чи къанажагьдин ва руьгьдин винизвал гьисс ийиз тада.
Квелди чаз Сулейман икьван сейли я ва вучиз са бязибуруз гилани адан яратмишунри, машгьурвили секинвал гузвач? СтIал Сулей¬ман вичин девирдин хва хьана. Шиират ам патал, са бязибуруз хьиз, машгъулат хьанач. Башкъа яз, уьмуьрдин зидвилер, вири четинвилер вичин хамунал гьисс авур адан поэзия вичин девирдин гьакъикъи гуьзгуьдиз элкъвена. Ада вич яшамиш хьайи девирда кьиле фейи саки вири вакъиайрикай шиирра вичин гаф лугьуз алахъзава. Халкьдин мецин яратмишунриз, уьмуьрдин гьакъикъатдиз мукьвавили, кIелиз асантвили, фикиррин деринвили чIалан, образрин къешенгвили шаирдин эсерар, адан тIвар уьлкведин вири халкьариз сейли авуна. Эхь, вичин девирдин шикил къалурзавай чIаларалди, камаллу гафаралди ва краралди СтIал Сулеймана неинки вичин гъвечIи халкь, гьакI Дагъустанни дуьньядиз машгьурна.
И жигьетдай чи рикIел машгьур алим, писатель ва литературовед рагьметлу Агьед Агъаева лагьай гафар хквезва. Ада кхьенай: «Жуван чIехи Ватан машгьур авур шаир чIехиди я. Амма жуван гъвечIи халкь машгьур авур шаирни тIимил чIехиди туш. СтIал Сулейман ибур кьведни кьван чIехи я: ада гьам чи чIехи Ватан, гьамни чи гъвечIи халкь дуьньядиз машгьур авуна».
СтIал Сулейман вич савадсуз кас тиртIани, уьмуьрдин уьцIуь-цуру дадмишнавай, ада вичин хивез къачунвай шаирвилин жавабдарвал, обществода вичин чка дериндай аннамишнавай.
«- Эгер шаир ятIа, чан алай мийит тушиз, адавай кисна акъвазиз жедач», - лагьанай арифдарди.
Вич чи уьлкведин, инсаниятдин тарихда кьиле физвай и зурба дегишвилерин шагьид ва иштиракчи хьунал шад тир ада вич цIийи девирдикай мани лугьудай билбил яз гьиссна, адан яратмишунри цуьк акъудзава.
«- За я жуван сагъвал, я жуван къуватар гьайиф татана, зи амай уьмуьр михьиз чи чIехи бахтавар Ватандиз къуллугъуниз акъудда» - лагьанай шаирди ва ада вичин гафни xвенай. Адан уьмуьр чаз, яратмишзавайбуруз, хайи халкьдиз, Ватандиз къуллугъ авунин ачух чешне, адан яратмишунарни илгьамдин чешме я. Адан тIвар чи рикIера эбеди яз амукьда.
