- Надир Низамиевич, сифтедай заз вуна отделдин асул везифайрикай лагьанайтIа кIанзавай.
- Куьрелди лугьун хьайитIа, гражданско-патриотический рекьяй жегьилриз тербия гун, спортдин массовый ва физкультурадинни сагъламвилин мярекатар тешкилун ва тухун – ибур чи отделдин кIвалахдин асул хилер я. КIвалахни чна мярекатар тухун патал туькIуьрнавай календардихъ ва жегьилрин политика уьмуьрдиз кечирмишунин пландихъ галаз кьадайвал ийизва. И карда чна образованидин, культурадин отделрихъ ва маса организацийрихъ галаз сих алакъада аваз кIвалахзава.
Отделди 2014-йисуз райондин дережада 30-далай виниз ва хуьрерин поселенийра 190-дав агакьна спортдинни массовый жуьреба-жуьре мярекатар тухвана. Анра иштиракзавай жегьилрин кьадарни йисандавай-суз артух жезва. Мисал яз, эгер 2013-йисуз ихьтин мярекатра 11100 касди иштиракнайтIа, 2014-йисуз 13800 касди иштиракна.
Районда жаванринни жегьилрин спортдин 4 школа (ДЮСШ) кардик ква, анра 2100-далай виниз гадайрини рушари спортдин гьар жуьрейрай вердишвилер къачузва ва чпин устадвал хкажзава.
Алатай йисуз районда 1 кас РФ-дин спортдин мастер, 6 кас мастервиле кандидатар, 869 кас разрядникар гьазурна.
Райондин спортсменри азаддаказ кьуршахар кьунай, самбодай, дзюдодай, армспортдай, боксдай кьиле тухузвай Вирироссиядин, республиканский, зональный акъажунра, чемпионатра кIвенкIвечи чкаяр кьазва.
- Гьакъикъатдани, райондин спортсменри къазанмишзавай агалкьунри чун шадарзава. Гьавиляй заз вуна Куьредин тIвар хкажзавай са шумуд спортсмендин тIвар кьунайтIа кIанзавай. Мадни, районда гьихьтин турнирар тухузва?
- Им са шумуд йис я райондин командади армспортдай Дагъустан Республикадин чемпионатра ва кIвенкIвечивал патал тухузвай акъажунра 1-чкаяр кьаз. ИкI, алатай йисуз ихьтин акъажунра райондин 9 спортсменди 1 ва 11 спортсменди 2-чкаяр кьуна.
Екатеринбург шегьерда армспортдай кьиле фейи Россиядин чемпионатда Эрзиман Алисултанова (Чуьхверхуьр) 75 килограммдин заланвиляй 1-чка, ада, гьакIни Малик Тагьирбегова, Рамидин Къазимегьамедова, Исабег Тагьирбегова Бакуда кьиле фейи Европадин чемпионатда иштиракна.
Самбодай ва дзюдодай Аслан Къурбановахъ, Руслан Аскеровахъ, Икрам Алискеровахъ, Рамазан Ражабовахъ, Ибрагьим Къурбановахъ ва масабурухъ хъсан нетижаяр, агалкьунар жезва.
Идалайни гъейри, районда гьар йисуз волейболдай Россиядин Федерациядин Игит Радим Халикьован, генерал-майор Мегьамедгьанифа Шайдаеван, Велибег Ягъибегован, футболдай Ажадулагь Жарулаеван, Раидин Къазимегьамедован, шашкайрай Вавилон Къазиеван гьуьрметдай, мини-футболдай муниципальный райондин Кьил Нариман Абдулмуталибован призар патал, гьакIни азаддаказ кьуршахар кьунай, винтовкадай лишанар ягъунай, дзюдодай, самбодай ва армспортдай райондин кIвенкIвечивал патал акъажунар тухузва.
Райондин школьникрин арада тухвай спартакиадада 700-дав агакьна школьникри иштиракна.
Мадни, райондин командайри «Зарница», «Орленок», «Победа», «Президентские спортивные игры», «Президентские состязания» тIвар алаз тухузвай женгининни спортдин къугъунра хъсан нетижаяр къалурзава. «Кавказские игры» республиканский фестивалда райондин командади 1-чка кьуна.
- Райондин жегьилрихъ спортда хъсан нетижаяр хьуни чак шадвал кутазва. Гьа са вахтунда, жегьилар руьгьдинни ахлакьдин жигьетдай тербияламишунихъни еке метлеб ава. И рекьяй отделди вуч кIвалах тухузва?
- Жегьилрихъ галаз тербиядин, ахлакьдин, профилактикадин кIвалах тухудайла чна «2014-2018-йисара Сулейман-Стальский районда агьалийриз патриотический тербия гун» ва «Наркотикар квай шейэр ишлемишунин ва абуралди алвер авунин кардиз акси кIвалах тухунин рекьяй комплексный серенжемрин гьакъиндай» муниципальный программайрал амал ийизва.
Районда дяведин ветеранрихъ, Афгъанистандин вакъиайрин иштиракчийрихъ галаз гуьруьшар, «Годен к строевой», «А ну-ка, парни», «Я помню – я горжусь!», «Мы патриоты России», «Я люблю тебя, Россия!» программарай конкурсар, «Шарвили» эпосдиз, Яран сувариз, Гъалибвилин йикъаз, Ватан хуьзвайбурун йикъаз талукь мярекатар тухузва. Анра, гьакIни республикада тухузвай «Вахта памяти», «Наследники Победы», «Я гражданин», «Гаджиевцы», «Машук» фестивалра, гьерекатра, конференцийра райондин жегьилри активвилелди иштиракзава.
Районда 25 касдикай ибарат яз Жегьилрин парламентни кардик ква. Вилик акъвазнавай месэлаяр гьялунин карда адани вичин пай кутазва.
- Надир Низамиевич, авунвай кIвалахар, хьанвай хъсан нетижаяр чавай къакъудзавач, абуру разивилин гьиссер арадал гъизва. Гьелбетда, отделдин кIвалахда вири кIвалахар хъсанзава, хъувуна кIанзавай кIвалахар амач лагьайтIа дуьз жедани?
- Ваъ. Чи отделдин, санлай райондин жегьилрин вилик хъийидай кIвалахар гзаф кума. Абурукай яз завай жегьилар терроризмдивай ва экстремизмдивай яргъа авун патал профилактикадин кIвалах гужлу авун, жегьилар физкультурадинни спортдин, культурадинни массовый кIвалахрал жезмай кьван гзаф желб авун ва ихьтин маса кIвалахар къалуриз жеда. И рекьерай чна кIвалахзава. Рехъ физвай касди атIуда лагьайвал, райондин администрациядин, амай къуллугърин куьмекни галаз, инанмишвал ийиз кIанзава хьи, чалай вилик акъвазнавай везифаяр кьилиз акъудиз алакьда.
Хазран Кьасумов.
