Малум тирвал, улакьрин кьадар йисалай- cуз артух хьунин, рекьера хатасузвал хуьн таъминарунин къайдайрал амал тавунин ва са бязи улакьар идара ийизвайбур ички хъванваз рулдихъ ацукьунин нетижада эхиримжи йисара чи райондин сергьятдани машинар сад- сада акьуна аварияр арадал атунин, инсанриз еке хасаратвилер хьунин гзаф дуьшуьшар жезва.
Ахьтин дуьшуьшар тикрар тахьун патал рекьера хатасузвал хуьнин къайдаяр чIурзавай тахсиркаррин гьакъиндай гьихьтин серенжемар кьабулзаватIа чирун патал чун и йикъара райондин прокурордин старший помощник Акимов Фархад Замидиновичан патав мугьман хьана ва адавай и жигьетдай куьруь суьгьбет авун тIалабна. Агъадихъ чна адан суьгьбет гузва.
-Гьакъикъатдани, вири уьлкведа ва республикада хьиз, чи райондани улакьрин кьадар артух хьуникди рекьера хатасузвал хуьнин къайдайрал бес кьадар амал тавунин нетижа дааварийрикди инсанриз чпиз, гьакIни яхди физвайбурузни еке хасаратвилер хьунин, кьиникьин дуьшуьшарни жезва. ГИБДД- дин работникри ихьтин гьалар арадал татун патал гуьзчивал тухузватIани, таъкимарзаватIани гзафбур суддин вилик акъвазуниз мажбур жезва. Кьилди къачуртIа, килигин чун алатай йисалай инихъ райондин суддал талукь къарарар акъуднававй са шумуд уголовный делодиз.
2008- йисан 21- августдиз райондин суд РФ- дин УК- дин 264- статьядин 1- паюна тайинарнавай тахсиркарвиляй тахсиркар авунвайди яз гьисабзавай, вич чи райондин ЦIийи Макьарал яшамиш жезвай, 1950- йисуз дидеди хайи Сардаров Тарикъули Рамазановичан гьакъиндай уголовный делодиз килигна. Анал малум хьайивал, Т.Р.Сардарова 2007- йисан 22- январдиз, тахминан йифен сятдин иридан сураз, А 723 ТХ госнумрайрин ВАЗ- 21061 автомашинда аваз Советское хуьр галайвал «Кавказ» шегьре рехъ кьуна хкведайла ЦIийи Макьарин хуьруьн сергьятда рекьера гьерекат авунин къайдаяр чIуруналди (аварийный эквер кутун тавуна ва гьерекат явашар тавуна, рекьин юкьвай физвай сад тир лацу цIарцIелай элячIуналди) вичив гвай улакь Ц.Б.Уруджева идара ийизвай В 025 ХК госнумрадин ВАЗ 21074 автомашинда акьурна. ДТП- дин нетижада У.Б.Уруджеван бедендиз залан тир хасаратвал хьана.
ИкI, вичин гьерекатралди суддин вилик акъвазнавай Т.Р.Сардарова РФ- дин УК- дин 264- статьяддин 1- паюна тайинарнавай тахсиркарвал авуна. Ада вичин тахсир тамамвилелди хиве кьуна. Гьа са вахтунда 2008- йисан 18- августдиз Т.Р.Сардарова суддин силис тухун тавуна суддин къарар акъудунин гьакъиндай тIалабна. И кардин гособвинитель ва зарар хьайиди вични рази хьана.
Судди, вири терефар фикирдиз къачуналди, Т.Р.Сардаров са йисуз азадвиликай ва гьакIни са йисуз улакь идара авунин ихтиярдикай магьрум авунин къарар акъудна. РФ- дин УК- дин 73- статьядихъ галаз кьадайвал, 6 вацра вич дуьз тухунин вахт гуналди, дустагъ атIун шартIунинди яз гьисабунин, са йисуз улакь идара авуникай магьрум авунин къарар акъудна.
Алатай йисан 10- октябрдиз райондин суд РФ- дин УК- дин 264- статьядин 2- паюна тайинарнавай тахсиркарвал авунай суддин вилик акъвазнавай, вич Кьасумхуьрелай тир, 1985- йисуз хьанвай, Мегьамедов Заур Лазировичан гьакъиндай уголовный делодиз килигна. Тайин хьайивал, З.Л.Мегьамедова 2008- йисан 27- июлдиз «Мамрач Ташкапур» шегьре рекьин 10- километрдивай тIимил яргъа «Престиж» АЗС алай чкадал рекьера гьерекат авунин къайдайрал амал тавунин нетижада адав гвай ВАЗ- 21093 маркадин автомашин Н.Н.Герейханова идара ийизвай ГАЗ- 3II0 маркадин автомашинда акьуна. Нетижада, ВАЗ- 21093 автомашинда авай пассажир З.А.Муртузалиев хьайи залан хасаратвилерикди чи райондин центральный больницада кьена.
Ада вичин тахсир тамамвилелди хиве кьуна ва зарар хьайибурув гуьгьуьллувилелди хьайи зарардин къимет вахкана, куьмекар гана, абурун разивални аваз, и делодай суддин силис тухун тавуна талукь къарар акъудун тIалабна. Эхь, РФ- дин УПК- дин 314 статьядин 1- паюнихъ галаз кьадайвал, авур тахсиркарвилерай гузвай жазадин кьадар 10- йисалай виниз тушиз азадвиликай магьрум авун яз хьайитIа, тахсиркарвилин делойрайни суддин силис кьиле тухунин кьетIен къайдадикайни менфят къачуз жеда. Адаз къалурнавай статьядай 2- йисахъ агакьна жаза гун къалурнавай.
Вичиз зарар хьайидини ва гособвинителни ихьтин меслятдал рази хьана.
Судди, вири терефар фикирдиз къачуналди, РФ- дин УПК- дин 296- 298, 314- 317- статьяйрал бинеламиш хьуналди, Мегьамедов Заур Лазирович РФ- дин УК- дин 264- статья ишлемишуналди, 20000 манат пул жерме авунин къарар акъудна.
2008- йисан 13- ноябрдиз кьиле фейи райондин суддин вилик рекьера улакь идара авунин къайдаяр чIурунин нетижада ДТП арадал гъана, инсандин сагъламвилиз залан зарар гунай РФ- дин УК- дин 264- статьядин 1- паюнай тахсиркар яз гьисабзавай, вич 1986- йисуз хайи, Кьасумхуьрел яшамиш жезвай Меликов Шамсудин Замирович акъвазуниз мажбур хьана.
Кардин тегьер ихьтинди я: 2008- йисан 27 августдиз, йифен сятдин 11 даз «Кавказ» федеральный шегьре рекье Эминхуьруьн къекъуьндал рекьера улакь идара авунин къайдаяр чIуруналди, еке йигинвал аваз рекьин муькуь паюниз экъечIуналди, ада вичив гвай «Тайота» автомашин И.М.Мегьамедова идара ийизвай «ИЖ- 2717» маркадин автомашинда акьурна, вичин машинда авай пассажир И.М.Меликован сагъламвилиз еке зарар хьана. И тахсиркарвал адалай 10 агъзур манат жерме гуналди алатнатIани, судди зарар хьайидаз вичиз хьайи зиян гражданвилин искдин къайдада вахчудай ихтияр авайди къейдна.
Рекьера улакьрин гьерекатдин къайдайрал амал тавунин, Законар чIурунин нетижада суддин вилик акъвазай са жерге инсанар алай йисакай алатнавай девирдани хьанва. Абурукай виридакай рахунин лазимвални, чаз чиз, авач. Анжах са кар къейд ийиз кIанзава: гзафбуру рекьера улакьрин гьерекатдал амал авунин къайдаяр векъидаказ чIурзава, са чIуру кIвалах хьайидалай гуьгъуьниз ахпа и кар, чеб законриз акси экъечIзавайди, аннамишзава.
Ихьтин нетижайрал къведалди ша чна сифтедамаз, улакьдихъ ацукьдалди, фикир законрал ва къайдайрал амал ийин.
