Адет хьанвайвал, 1950-йисалай башламишна, гьар йисан 7-апрелдиз вири дуьньяда сагъламвилин югъ къейдзава. Им 1948-йисан апрелдин гьа и юкъуз Виридуьньядин Сагъламвилин Организация (ВОЗ) тешкилунихъ галаз алакъалу я. Гьа чIавалай инихъ алатнавай девирда дуьньядин 200-далай гзаф государствойрикай и тешкилатдин членар хьанва.
Инсанрин сагъламвал хуьзвайбурун жергедик, сифте нубатда, духтурар акатзава. Гьавиляй и лишанлу йикъан вилик зун Герейханован хуьруьн 2- отделенида кардик квай фельдшервилинни акушервилин пунктунин духтур Эльмира Гьайдаровадихъ (шикилда) галаз гуьруьшмиш хьана.
- Духтур - им кьетIен пешедин иеси я лагьайтIа, бажагьат зун ягъалмиш жеда, - лугьузва Э. Гьайдаровади. –Гиппократа лагьанай: «Гьар са кас инсандив, вичив гьикI эгечIна кIанзаватIа, вични гьакI эгечIуниз, азарлудан хер вичин хер хьиз гьисабуниз мажбур я». Духтурвилин пеше хкянавай, чпин хиве инсандин виридалайни багьа девлет-сагъламвал-хуьнин везифа авай духтурриз и келимаяр иллаки хас я.
Хуьре командировкада авайла чна са шумуд касдихъ галаз медработникрин кIвалахдикай ихтилатар авуна. Эльмира духтурдин гъилин кьезилвиликай, мецин ширинвиликай, ам вичин хиве авай везифайрив эгечIзавай тегьердилай чаз разивилин келимаяр иллаки гзаф ван хьана.
Малум хьайивал, Э.Гьайдаровади 1978-йисуз Дагъустандин мед училище акьалтIарна, гьа йисалай инихъ ам хуьруьнвийрин сагъламвал хуьнин ва мягькемарунин къуллугъда акъвазнава. И йисара духтурди хуьруьнвийрин патай лайихлу гьуьрметни къазанмишнава.
- Чна, духтурри, михьивал сагъламвилин замин тирдини рикIелай ракъурзавач, - лугьузва Э.Гьайдаровади. - Гьавиляй хуьруьн поселенидин депутатрихъ галаз чна хуьре рейдар тешкилзава, михьивилер хуьнал гуьзчивал тухузва, инсанрихъ галаз суьгьбетар ийизва.
Э.Гьайдаровадин кIвалахди-лай агьалияр рази я.
Хазран Кьасумов