Алай йисан 21-мартдиз райадминистрацияда 5-сеферда эвер ганвай райондин депутатрин Собранидин нубатдин заседание хьана. Ам муниципальный райондин Кьил – райондин Собранидин Председатель Абдулмуталибов Нариман Шамсудиновича ачухна ва кьиле тухвана.
Заседанидин кIвалахда райадминистрациядин Кьил Мегьамедханов Штибег Гьажимегьамедовича, адан заместителри, хуьрерин поселенийрин кьилери, райондин къайдаяр хуьдай органрин, райадминистрациядин къурулушрин, образованидин, медицинадин, культурадин, общественный организацийрин, СМИ-рин руководителри ва векилри иштиракна.
Анал «2013-йисуз район яшайишдинни экономикадин жигьетдай вилик финин нетижайрикай ва 2014-йисуз вилик акъвазнавай везифайрикай» муниципальный райондин Кьил Абдулмуталибов Нариман Шамсудиновича гьахъ-гьисабдин доклад авуна.
И месэладай анал алатай йисуз авур кIвалахдиз къимет гунин ва чпин са бязи фикирар, теклифар гваз райондин Собранидин депутат, «Хуьруьн майишатдин ва суьрсетдин управление» МКУ-дин руководитель Мегьамедзагьид Бабаев, Цмуррин хуьруьн поселенидин кьил Раида Алибегова, РУО-дин начальник Жабраил Асланов, ЦРБ-дин кьилин духтурдин заместитель Ракъуят Гъаниева, общественный хатасузвилин рекьяй райадминистрациядин Кьилин заместитель Гьажиагьмед Гьажиагьмедов, райондин агъсакъалрин Советдин председатель Фахрудин-гьажи Османов рахана. Абуру 2013-йисуз МР-дин Кьил Н. Ш. Абдулмуталибова тухвай кIвалахдиз рази жедай къимет гунин теклиф гъана.
Депутатри и теклифдин тереф хвена ва анал гьялай месэладай талукь къарар кьабулна.
Заседанидал гьакIни «Защита населения и территории от чрезвычайных ситуаций природного и техногенного характера, обеспечение пожарной безопасности людей на водных объектах на территории муниципального района «Сулейман-Стальский район» на 2014-2018 годы» месэладай райондин ГО-дин начальникдин заместитель Къазиагьмед Абумуслимов ва «О порядке выплаты ежемесячной денежной компенсации на приобретение книгоиздательской продукции и периодических изданий педагогическим работникам муниципальных общеобразовательных организаций муниципального района «Сулейман-Стальский район» месэладайни райадминистрациядин юридический отделдин начальник Мегьамед Исмаилов рахана. И месэлайрайни талукь къарарар кьабулна.
