Мукьвара Махачкъалада, Дагъустандин педагогвилин кадрийрин пешекарвал хкаждай институтда (ДИПКПК) «2014-йисан Дагъустандин виридалайни хъсан педагог-психолог» лишандик кваз республикадин IV-конкурс кьиле фена. Конкурс ДР-дин образованидин, илимдин ва жегьилрин крарин рекьяй министерстводин ДИ-ПКПК-дин педагогикадин ва психологиядин кафедради тешкилнавайди тир. Иниз чпин устадвал къалуриз республикадин шегьерра ва районра кьиле фейи заочный паюна гъалибвал къазанмишай 20-далай виниз педагогар-психологар атанвай. Абурун арада НуьцIуьгърин юкьван школадин муаллим Руслан Шабановни авай.
- Конкурсдин макьсад чпихъ бажарагъ авай муаллимар-психологар тайинарун, абурун кIвалахдиз къимет гун, хъсан тежриба авай педагогрин-психологрин кIвалах Дагъустан Республикадин образованидин идарайра пропаганда авун, ДР-дин психологиядинни педагогвилин къуллугъ вилик тухуникай ибарат тир,-лугьузва Р.Шабанова.- Мярекат 3 юкъуз давам хьана. Сад лагьай юкъуз конкурсдин иштиракчийри самопрезентация (вичи вич раиж авун) ва пешекарвилин гьазурлухвал ахтармишдай тестериз жавабар гана, кьвед лагьай юкъуз конкурсдик психолого-педагогический практикум кутуна, пуд лагьай юкъуз конкурсантри мастер-классар гана. Финалдиз акъатайбуру чпиз хъсан акур жуьреда тренинг, диде-бубаяр, школайра кIелзавай аялар гъавурдик кутунин рекьяй тарсар-мярекатар тухвана. Ачух тарсарин иштиракчияр студентар хьана.
Р.Шабанова лагьайвал, ДИПКПК-дин педагогикадин ва психологиядин кафедрадин заведующий, психологиядин илимрин кандидат А.Демидовади, ДР-дин образованидин, илимдин ва жегьилрин крарин рекьяй министрдин 1-заместитель, биологиядин илимрин доктор, профессор Ш. Алиева, ДИПКПК-дин проректор, биологиядин илимрин кандидат, профессор Э. Сайпуевади, ДГПУ-дин психологиядин илимрин доктор, профессор М.Далгатова авур докладри-рахунрини конкурсдин иштиракчийриз екез таъсир авуна.
Асият Мусаева
