Райондин руководстводихъ галаз агьалийрин алакъа къвердавай мягькем хьуни санлай кIвалах вилик финиз еке куьмек гузва.
2013-йисан 28-октябрдиз муниципальный райондин Кьил Абдулмуталибов Нариман Шамсудиновичан тIварцIихъ Асалдхуьруьн жемятдин тIалабуналди муаллим ва агъсакъал Гьажимурадов Пирмегьамеда кхьенвай чар атана.
Ана райондин руководстводи эхиримжи йисара гуьне патан хуьрерихъ чин элкъуьрнавайди, са жерге маса месэлаяр гьялунихъ галаз санал хуьрерин вири школайриз, кьилдин хуьреризни тIебиатдин газ гъанвайди къейд авунихъ ва и кардай чухсагъул лугьунихъ галаз санал, «Сулейман-Стальский район» муниципальный райондин хуьрериз 2012-2015-йисара ва 2020-йисалди тIебиатдин газ тухунин Программадин бинедаллаз 2013-йисуз Асалдхуьруьз газ тухунин кIвалахдик тади кутаз тун тIалабзавай ва и кIвалах ДР-дин Халкьдин Собранидин депутат, чи районэгьли Мегьамедов Гьамидуллагь Исмаиловичани хиве кьурди къейднава.
Гьакъикъатдани, гуьне патан маса хуьрериз хьиз, Асалдхуьруьзни 2012-2013-йисара тIебиатдин газ тухун райондин программадик кутунва. И жигьетдай кагъаздин иесидиз тайин жаваб гун патал райондин руководстводи а чар талукь тир къуллугърин руководителрал рекье туна.
2013-йисан 28-ноябрдиз муниципальный райондин администрациядин Кьил Мегьамедханов Штибег Гьажимегьамедовичан тIварцIихъ «сельсовет Испикский» хуьруьн поселенидин администрациядин кьил Р. Гь. Магьмудова агакьарнавай справкада къейдзавайвал, Асалдхуьруьз тIебиатдин газ тухунин кIвалахар 2013-йисан 13-октябрдилай башламишнава ва и кардал «Спецгазстройсервис» КПРД-дин «Луч» ООО машгъул я. Алай йисан эхирдалди Асалдхуьре тIебиатдин газ тухунин кIвалахар акьалтIарда.
ЦIийи йисан вилик квай йикъара чун, чкадин СМИ-йрин векилар, и хуьре тIебиатдин газ тухунин кIвалахар кьиле физвай гьалдихъ галаз таниш хьана. Малум хьайивал, гьакъикъатдани, хуьре газдин линияр тухунал сварщикар тир стхаяр – Тагьир ва Наврузбег Уружбеговар машгъул я. Абуруз и хуьруьнвияр тир Эмиргьамзаев Сергеяни Бабаев Алиосмана куьмекар гузва.
Абурун кIвалахдал гуьзчивал тухузвайди тир пешекар и хуьруьнви Нисредов Къиясудин Бутаевича къейд авурвал, хуьре тIебиатдин газ тухунин кIвалах, Дагъустандин хуьрер газификацировать авунин Гьукуматдин программадин сергьятра аваз, республикадин бюджетдин такьатрин гьисабдай кьиле тухузва. Махсус проектдин бинедаллаз хуьруьн куьчейра 4 километрдин мензилда газдин линияр тухун герек я. Гьелелиг 2 километрдилай виниз мензилдиз тайинарнавай къайдада газдин турбаяр тухванва ва и кIвалах давамарзава.
- Декабрдин вацра къвайи, гилани цIран тийизвай, къалин живери чи кIвалах вилик финиз са кьадар кьецI гана, - лугьузва сварщик Уружбегов Тагьира. – Чаз герек кьадар газдин турбаярни хкана чкадал ала. Аллагьдик умуд кутуналди, чна алукьзавай ЦIийи йисан мартдин вацра чи кIвалах акьалтIарда ва Яран сувариз хуьруьн жемятдиз суварин хуьрекар тIебиатдин газдин куьмекдалди гьазурдай мумкинвал жеда.
Эхь, чнани и кардик кIевелай умуд кутазва.
Эхирдай абуру чаз лагьайвал, алай вахтунда гуьне пата авай Пиперхуьруьзни тIебиатдин газ тухунин кIвалахар кьиле физва.
Умудзава, ЦIийи йисуз гуьне патан маса хуьрерин агьалийрини тIебии газдин чим ва къулайвал гьисс ийида.
Абидин Камилов
