Мукьвара «Сулейман-Стальский район» муниципальный районда кардик квай терроризмдиз акси комиссиядин нубатдин заседание хьана. Адан кIвалахда комиссиядин членри, къайдаяр хуьдай ва гуьзчивал тухудай органрин руководителри, администрациядин жавабдар работникри, хуьрерин поселенийрин кьилери ва агъсакъалрин Советрин председателри, диндин, общественостдин ва массовый информациядин такьатрин векилри иштиракна.
Заседание муниципальный райондин Кьил, терроризмдиз акси комиссиядин председатель Нариман Шамсудинович Абдулмуталибова кьиле тухвана. Ам ачухуналди райондин Кьили лагьайвал, районда терроризмдин, экстремизмдин вилик пад кьун патал тайин кIвалах тухузватIани, и рекьерай санлай районда гьалар къайдадик ква лугьуз жедач. Райондин агьалийрин хатасузвал хуьн – им чи кьилин везифа я. Мукъаятвал мягькемарна, къанун-къайда хуьн таъминарна кIанзава. Къайдаяр чIурдай, законрал амал тийидай ихтияр гьич са касдизни авайди туш, я чна ихьтин крариз, инсанриз рехъни гудач. Террориствилихъ ва экстремиствилихъ галаз районда эхиримжи вахтара чIуру са шумуд дуьшуьш хьана, ида чак – райондин гьар са агьалидик къалабулух ва секинсузвал кутазва. Ихьтин рикI тIардай, райондин тIварцIел, ана тухвай хъсан гзаф крарал леке гъизвай кIвалахар тахьун патал талукь къуллугъри, гьар са касди кIвалахни тухун чарасуз я.
Терроризмдикай ва цIаяр кьунрикай хуьнин рекьерай районда авай гьалдикай, тухузвай кIвалахдикай ва вилик акъвазнавай везифайрикай заседанидал администрациядин Кьилин заместитель Савин Велиева информация авуна. Ада къейд авурвал, террориствилин гьерекатрикай хуьн патал райондин вири объектрал ахтармишунин кIвалах тухванва, рехъ гузвай кимивилерикай анрин руководителар хабардар авунва, кимивилер арадай акъудун патал абур таъкимарнава.
Райондин образованидин учрежденийра терроризмдин гьерекатрикай хуьн патал тухузвай кIвалахдикай, и месэладиз талукь яз образованидин учрежденийрин руководителрихъ галаз тухвай совещанидин нетижайрикай РУО-дин начальникдин заместитель Къачабег Аминова, райондин территориядал алай объектар, гьакIни гзаф инсанар кIватI жезвай чкаяр цIаяр кьунрикай хуьн патал тухузвай кIвалахдикай 25-нумрадин пожарный частунин начальник Мурад Абдиева, районда общественный къайдаяр хуьн, терроризмдин ва экстремизмдин гьерекатрин вилик пад кьун патал тухузвай кIвалахдикай районда авай ОВД-дин начальник Абдуллагь Мирзеханова информацияр авуна.
Заседанидал мад сеферда рахун хъувур Савин Велиева терроризмдиз акси комиссияди 2013-йисуз тухвай кIвалахдикай ва 2014-йисуз вилик акъвазнавай везифайрикай гегьеншдиз лагьана.
Заседанидал алай месэлайрай райондин имам Рамазан гьажиди, райондин агъсакъалрин Советдин председатель Фахрудин Османова ва маса юлдашри чпин фикирар лагьана.
Терроризмдиз акси комиссиядин заседанидин нетижаяр кьуналди, Нариман Шамсудинович Абдулмуталибова къейд авурвал, райондин вири къуллугъри, гьар са агьалиди, общественный тешкилатри анжах сихдаказ кIвалах авуналди, къанун-къайда хуьналди терроризмдин, экстремизмдин ва маса чIуру гьерекатринни кIвалахрин вилик пад кьаз жеда. Чи виридан фикирни районда хатасузвал, саламатвал ва къанун-къайда хуьникай ибарат я.
Хазран Кьасумов