«…Эцигзава, эцигзава, ц1ийи хъийиз, эцигзава…»-гуя и гафар Алибег Фатахова къенин йикъара районда, кьилди къачурт1а Кьасумхуьрел кьиле тухузвай эцигунар, аваданламишунин рекьерай тамамарзавай к1валахар фикирда аваз кхьенва.
Райцентрадин агьалияр ва адан мугьманар шагьидар хьанвайвал, гатфарин сифтегьанди тир мартдин варз алукьуникди Кьасумхуьрел общественный дараматрин патарив, рекьерин къерехрив гвай, фад ак1урнавай, «кьуьзуь» хьанвай тарар ат1узва. Ик1, почтадин, административный пуд мертебадин дараматрин патарив гвай, райондин баркаллу рухвайринни рушарин шикилар тунвай «Баркалладин доскадин» вилик квай, гьак1ни рекьерин къерехра авай хейлин тарар ат1анва. Абурун дараматрин акунарни далдадик кутазвай, аваданламишунин жигьетдай алай аямдин истемишунриз ва къайдайриз жавабни гузвачир.
Куьгьне тарар ат1ай чкайра ц1ийи, гуьрчег аквадай къелемар ак1ур хъийида.
Райондин центр аваданламишунин рекьяй тухузвай к1валахрикай рахадайла, Ц1ийи поселокда ЦРБ-дин дараматдилай сбербанкдал кьван рекьин къерех тирвал туьк1уьрнавай парк-аллеяда гуьрчег аквадай къелемар цанвайдини къейд авун лазим я.
Гзаф йисарин ва баркаллу тарих авай Кьасумхуьр «жегьил» хъувунин ва аваданламишунин рекьерай райондин руководстводи ва «сельсовет Касумкентский» хуьруьн поселениди тухузвай к1валахдин тереф агьалийри к1евелай хуьзва ва райцентр къвердавай авадан хьунал шадвалзава.
Текст кхьейди ва шикил ягъайди Хазран Кьасумов я.