Малум тирвал, 2014-йис Россиядин Федерацияда Культурадин йис яз малумарнава. Уьлкведин вири чкайра хьиз, чи райондани Культурадин йис ачухуниз талукьарнавай мярекат шад гьалара кьиле фена, алай вахтунда ихьтин мярекатар райондин культурадин маканра, мектебра ва маса коллективра, общественный организацийрани кьиле тухузва.
И йикъара «Сулейман-Стальский район» муниципальный райондин Кьил Абдулмуталибов Нариман Шамсудиновича вичин кабинетда райадминистрациядин жавабдар къуллугърин, культурадин, образованидин идарайрин руководителрин, са бязи хуьрерин поселенийрин кьилерин, общественный организацийрин ва СМИ-рин векилрин иштираквал аваз гегьенш совещание кьиле тухвана. Ам районда Культурадин йис менфятлудаказ ва хъсан тешкиллувал аваз кьиле тухунин месэладиз талукьарнавайди тир.
Совещание ачухайла, анал райондин Кьил Н.Ш.Абдулмуталибова къейд авурвал, Культурадин йисаз талукьарнавай мярекатар тешкилдайла кьилин фикир чи халкьдин милли медениятдин, чи халкьдин руьгьдин ивирар хуьниз ва арадал хкуниз, багьа ядигарар яз абур гележегдин несилрал агакьаруниз гун важиблу я. И мураддалди оргкомитет тешкилнава, тухудай серенжемрин план туькIуьрнава ва ам кьилиз акъудунал гуьзчивал тухузва.
И жигьетдай анал куьруь информация гваз рахай райадминистрациядин кьилин заместитель Савин Велиева совещанидин иштиракчияр Культурадин йисан сергьятра аваз районда кьиле тухванвай ва гьакIни тухун планламишнавай серенжемрихъ галаз танишарна. Кьилди къачуртIа, алай йисуз райондин муниципалитетди райондин 85 йис, чIехи алим-тарихчи, философ ва просветитель Алкьвадар Гьасан-эфендидин 180 йис, Дагъустандин халкьдин шаир, зурба камалэгьли СтIал Сулейманан 145 йис, шаир-фронтовик СтIал Мусаибан 100 йис, философиядин илимрин доктор, академик, РАН-дин философиядин институтдин директор Абдусалам Гьуьсейнован 75 йис тамам хьунин ва маса юбилеяр кьиле тухвана кIанзавайди къейдна.
Абурулайни алава яз, алай йисан 5-майдиз, ЧIехи Гъалиб-вилин суварин вилик, Цмурдал и хуьруьнвияр-генералар тир Шайдаеврин хзанди чпин такьатрин гьисабдай ва гьакIни райадминистрациядин куьмекни галаз эцигзавай Гъалибвилин музей шад гьалара ачухда. А карни къейд ийиз кIанзава хьи, Шайдаеврин хзандай 3 генерал акъатнава. ЧIехи стха регьметлу Мегьемед-Гьанифа Гьажи-балаевич Ватандин ЧIехи дяведин активный иштиракчи, зурба военачальник, женгинин гзаф кьадар орденринни медалрин сагьиб тир. Адаз еке лайихлувилерай хуьруьн юкьвал алай Гъалибвилин майдандал Шайдаеври чпин такьатрин гьисабдай эцигнавай кIелунинни спортдин комплексдин вилик гуьмбет хкажнава. Гъалибвилин музей, хуьруьн центр мадни гуьрчегардай мад са имаратдиз элкъведайди хьиз, гьакI акьалтзавай жегьил несил чи бубайрин баркаллу крариз вафалубур яз тербияламишдай руьгьдин макандиз элкъведайдал шак алач.
Гъалибвилин музей тадаракламишунин жигьетдай авунвай ва яргъал вегьин тавуна хъувуна кIанзавай кIвалахрин, гьакIни СтIал Сулейманан 145 йисан юбилей кьиле тухунин гьакъиндай анал чпин фикирар гваз райадминистрациядин кьилин заместитель Савин Велиев, и музейдин директор Мегьамед Мегьамедов, райадминистрациядин УКС-дин начальникдин заместитель Герман Гьуьсейнов, СтIал Сулейманан мемориальный КIвал-музейдин директор Лидия Стальская, Цмуррин хуьруьн поселенидин кьил Раида Алибегова, райондин культу-радин отделдин начальникдин заместитель Жабир Султанов, анин работник Ярагьмед Ярагьмедов, «Куьредин ярар» общественный культурадин центрдин регьбер Агьмедпаша Агьмедпашаев ва маса юлдашар рахана.
Абуру чпин рахунра Гъалибвилин музей тадарак-ламишун, хуьруьнвийрин - дяведин ва зегьметдин фронтдин ветеранрин гьакъиндай делилар (шикилар, биографияр ва маса материалар) кIватIунин карда чи райондилай къеце яшамиш жезвай и хуьруьнвийрин куьмекни герек тирди, СтIал Сулейманакай кинояр, адан шииратдин Йикъариз, юби-лейриз талукьарнавай мярекатар (вечерар, «элкъвей столар», конкурсар) КТВ-дай къалурун, чкадин газетдай гун, цIийи рубрикаяр кардик кутун, фотовыставкаяр акъудун тешкилун, шаирдин шииррин тамам ктаб акъудун, идахъ галаз сад хьиз, шаирдин КIвал-музей, анал физвай рехъ ремонт ва аваданламишун, са бязи теклифар гваз республикадин руководстводин вилик экъечIун ва маса гьазурвилер акун чарасуз тирди лагьана.
Анал гьакI и лишанлу вакъиайрихъ галаз алакъалу яз Агъа СтIалдал цIийиз арадал атанвай куьчейриз, гьакI маса хуьрерани, маса районрани, чи халкьдин руьгьдин мягькем даяхар тир Гьажи Давудан, Ярагъви Мегьамедан, Етим Эминан, СтIал Сулейманан, адахъ галаз алакъада хьайи ва адаз куьмекар гайи Нажмудин Самурскийдин, Гьажибег Гьажибегован, Эфенди Капиеван ва масабурун тIварар гунин, Культурадин йисан сергьятра аваз ва чIехи алим-тарихчи, просветитель Алкьвадар Гьасан-эфендидин 180 йисан юбилей-дихъ галаз алакъалу яз райондин центральный библиотека ремонт авунин ва адаз юбилярдин тIвар гунин, а дараматдин вилик (СтIал Сулейманан гуьмбетдин къар-шида) Алкьвадар Гьасан-эфендидин бюст-гуьмбет эцигунин, райцентр аваданла-мишунин са жерге маса текли-фар гъана.
Эхирдай муниципальный райондин Кьил Н.Ш.Аб-дулмуталибова совещанидин кIвалахдин нетижаяр кьуна, анал гайи теклифрин гьакъиндай вичин фикирар лагьана, талукь къуллугъриз, юбилейрин мя-рекатрин тешкиллувилин коми-тетрин членриз герек тапшу-ругъар гана, меслятар къалурна, абур кьилиз акъуддай вахтар тайинарна.
