КIварчагърин дередиз гьахълудаказ къуччагърин дере лугьузва. Гьакъикъатдани, чилин къадир авай, четинвилерихъай кичIе тушир инсанар КIварчагърин, Зизикрин, НуьцIуьгърин ва Экенрин хуьрера виликдайни хьана, гилани ава.
Чпин пулунин такьатралди хуьруьн майишатдин карханаяр тешкилна ва я чилин участокар яргъал йисара арендада къачуна кIвалахзавай инсанрин кьадарни тIимил туш. Абурукай сад Алюсет Къухмазов я. Лагьана кIанда, адахъ производствода кIвалах авунин саки 25 йисан тежриба ава. 2008-йисуз ада 1 гектар чил 49 йисан муддатда арендада къачуна, ана уьзуьмлух кутуна. Гьа сифте йикъалай Алюсета анрихъ иесивилелди гелкъуьн тешкилна.
- Сифтедай дигидай цикай кьитвал авай, ида кIвалахда четинвилерни арадал гъана, - лугьузва А.Къухмазова.-«Сардархуьр-ДаркIуш къазмаяр» водовод себеб яз эхиримжи 2-3 йисан къене чун, зегьметчияр, дигидай целди таъмин я. Идай чна райондин руководстводиз чухсагъул лугьузва.
«сельсовет Карчагский» хуьруьн поселенидин кьил Асланбег Сефибеговахъ ва Алюсет Къухмазовахъ галаз чун уьзуьмлухра къекъвезва. Анра хъсан къайда, михьивал ава.
А.Къухмазова гьисабзавайвал, кIвалахдай касдиз арендадин къайда менфятлу я. Гьавиляй ада вичин арендадин участокни гегьеншарзава, цIийи уьзуьмлухар, багълар кутазва.
- Гьелбетда, КIварчагъ дередин шартIара уьзуьмчивал къазанжияр арадал гъизвай хел я,-лугьузва арендаторди.-Гьавиляй за алай йисан гатфарихъай 1,5 гектарда «Августина» тIвар алай сортунин цIийи уьзуьмлухар кутуна. И сортунин ципицIар чи патара фад дигмиш жезва, адан бегьерлувални гзаф я.
А.Къухмазова алатай йисуз 1 гектарда ичин багъни кутуна.
Уьзуьмлухар хьиз, арендатордин багъни чешнелу гьалда ава.
Хазран Кьасумов
