Райондин прокуратуради общественный къайда хуьн таъминарунин жигьетдай чкадин чпи-чеб идара ийидай органри халкьдин гуьгьуьллу дружинаяр (ДНД) тешкилунин ва кардик кутунин рекьяй кIвалах кьиле тухузвай гьал ахтармишна.
2003-йисан 6-октябрдиз 131-ФЗ нумрадик кваз акъудай «Об общих принципах организации местного самоуправления в Российской Федерации» Федеральный Закондин 14-статьядин 1-паюнин 33-пунктуна къалурзава хьи, общественный къайда хуьн таъминарун патал агьалийрикай гуьгьуьллу дружинаяр тешкилун ва кардик кутун поселенийрин чкадин метлеб авай месэлайрик акатзава.
Республикада дуьзгуьн тушир гьалар арадал атунихъ ва диндин векилрал, къайдаяр хуьдай органрин работникрал абурун чандиз къаст авунин, санлай ДР-да гьалар къайдадикай хкудунин мураддалди террориствилин актарин дуьшуьшар мукьвал-мукьвал хьунихъ галаз алакъалу яз и жигьетдай хуьрерин поселенийрин векилвилер ДР-дин Президентди 2012-йисан 3-сентябрдиз 144-нумрадик кваз акъудай «О привлечении граждан к охране общественного порядка» Указдалди мадни мягькемарнава, гьакIни 2013-йисан 8-октябрдиз 2-нумрадик кваз «Об участии граждан в охране общественного порядка в Республике Дагестан» Законни кьабулнава.
Законодательстводин истемишунрал амал тавунин дуьшуьшар малум хьунихъ ва гьакIни и месэладай хуьрерин поселенийрин кIвалахда кимивилериз рехъ гунихъ галаз алакъалу яз хуьрерин 16 поселенидин гьакъиндай исковый заявлениярни галаз прокуратуради суддиз обращение рекье туна. С-Стальский райондин суд 2013-йисан 23-сентябрдиз прокуратурадин вири арзайриз тамамвилелди килигна. ИкI, гзаф хуьрерин поселенийрин кьилери, гьа гьисабдай яз «сельсовет Новомакинский» СП-да, общественный пунктар (ДНД-рин штабар) алай вахтунда герек мебелдалди, инвертарралди, алакъадин такьатралди таъминарнавач, халкьдин дружинаяр дежурстводиз экъечIунин графикар туькIуьрнавач ва абурал амал ийизвач, общественный къайда хуьнин карда гьакъикъи иштираквал авачиз, адет патахъай халкьдин дружиникрин списокар туькIуьрнава.
ДНД-ра иштирак авунин жигьетдай агьалийрин ихтиярар законодательный къайдада тайинарнава ва абурувай общественный къайда хуьн таъминарунин жигьетдай полициядин участковый уполномоченныйрихъ галаз кьиле тухузвай рейдовый серенжемра иштираквал авун патал чкадин чпи-чеб идара ийизвай органривай истемишдай ихтияр ава. Дружиникриз социальный кьезилвилерикай, премийрикай ва маса руьгьламишдай серенжемрикай менфят къачудай ихтияр ава. ТIалабда, мумкинвилериз килигна, общественный къайда хуьнин, умуми саламатвал, ислягьвал ва къайда хуьнин карда активвилелди иштирак авун.
ДНД-риз кьабулдайла арадал къвезвай вири месэлайрай квез куьн яшамиш жезвай чкайрал алай чпи-чеб идара ийизвай органриз лугьудай, эгер куь ихтиярар чIуриз хьайитIа, райондин прокуратурадиз къведай ихтияр ава.
Я. К. Исмаилов, С. -Стальский райондин прокурордин куьмекчи