Мукьвара Кьасумхуьрел алай «Аптека-16» ООО-дин дараматдиз фейила, зи фикир ана авай хъсан къайдади, михьивили, эхиримжи вахтара хьанвай дегишвилери, тухванвай ремонтрин кIвалахри чпел желбна.
Гьелбетда, гьи организация, кархана хьайитIани, адан кIвалах, писни хъсан терефар, сифте нубатда, анин руководителдилай гзаф аслу я. Зун аптекадин заведующий Эмирбегов Ильяс Шагьпазовичахъ галаз гуьруьшмиш хьана.
Малум хьайивал, И.Эмирбегован ери-бине Хив райондин Хъукьварин хуьряй я. Хуьруьн юкьван школа акьалтIарай жегьил 1977-йисуз Пятигорск шегьердин фармацевтический институтдик экечIна. Анаг лап хъсан къиметар аваз акьалтIарай Ильяса вичин зегьметдин рехъ Дербент шегьердин аптекада фармацевтвиле кIвалах авунилай башламишна. Гуьгъуьнлай 3 йисуз ада Гунибдин центральный аптекадин заведующийвиле кIвалах-на.
1987-йисалай инихъ И.Эмирбегова Кьасумхуьрел алай 16-нумрадин аптекадин заведующий яз кIвалахзава. Ам фармацевтический илимрин кандидат я.
-Виликдай чиди государстводин аптека тир, кьве йис жезва адакай ООО хьана,-лугьузва И.Эмирбегова.-ТIварцIихъ галаз, аптекадин кIвалахда, агьалийриз къуллугъ авунин карда дегишвилер кьиле фена. Сифтени-сифте чна аптекадин дарамат капитальнидаказ ремонт авуна, къенепатан акунар дибдай дегишарна, дараматдин вилик квай гьаятдин чиле плитаяр туна, хейлин маса кIвалахар тамамарна. Кьилинди, иниз цIийи, алай аямдин истемишунриз жаваб гузвай тадаракар хкана.
Чаз акурвал, аптекадин зал чIехи авунва, ана цIийи тадаракар эцигнава.Ана аваз хьайи аптекадин лаборатория маса чкадиз акъуднава.
Аптекада оптикадин, косметикадин ва парфюмериядин шейэр маса гудай, гьакIни Ватандин ЧIехи дяведин иштиракчийриз, инвалидриз къуллугъдай кьилди-кьилдин отделар кардик акатнава.
Гьелбетда, къенин девирда ихьтин чIехи дарамат капитальнидаказ ремонт авун, аниз цIийи тадаракар къачун, аваданламишунин маса кIвалахар тухун регьят туш. Вири и крар пулунин такьатрихъ галаз алакъалу я.
- Ремонтрин кIвалахар чна республикадин бюджетдай ахъагъай ва чи хсуси пулунин такьатралди авуна,-лугьузва И.Эмирбегова.-ЦIийи тадаракар чаз Москвадин аптекайрихъ галаз алакъалу махсус фирмади гана.
Виликдай аптекади райондин центральный больница, хуьрерин медпунктарни амбулаторияр дарманралди таъминарзавай. Государстводин аптека ООО-диз элкъуьрайдалай гуьгъуьниз медучрежденияр дарманралди таъминарунин кIвалах адавай вахчуна. Гила «Аптека-16» ООО-ди Сулейман-Стальский, Кьурагь ва Хив районрин ЦРБ-яр махсус (наркотический) дарманралди таъминарзава.
Чаз малум хьайивал, агьалийри ишлемишзавай дарманар иниз Москвадай, Пятигорскдай, Махачкъаладай хкизва.
-Дяведин иштиракчияр, инвалидар дарманралди таъминарунни чи везифайрик акатзава,-лугьузва Ильяс Эмирбегова.-Ахьтинбур чи учетда 6000-дав агакьна ава. Гьайиф хьи, пулсуз гузвай дарманар къачузвайбур 120 кас ава. Амайбуру дарманрин эвездай пул къачузва. Им еке ягъалмишвал я. Какатай гьи аптекадай хьайитIани шаклу дарманар къачудалди, яшлу, чпиз льготар авай инсанри чи аптекадай гьакъикъи, заводрай хкизвай дарманар къачунайтIа, абуруз менфятни жедай, регьятни.
Аптекада чпихъ пешекарвилин рекьяй махсус образование авай 12 касди кIвалахзава. Хиве авай везифаяр агьалияр рази жедайвал кьилиз акъудзавай пешекаррикай яз чпихъ къад йисалай виниз тежриба авай фармацевтар тир Сафижат Бабаевадин, Суьлгьуьжат Эмирбеговадин, Жамиля Шихбабаевадин, дарманар гьазурзавайди тир Эльвиза Рамазановадин, жегьил пешекар Дадашева Самилядин тIварар кьаз жеда.
Гьакъикъатдани, «Аптека-16» ООО-да кIвалахдай, агьалийриз хъсандиз къуллугъдай кутугай шартIар яратмишнава. Ида анин дуствилин коллектив ашкъиламишзава.
Х. Кьасумов
