Эхиримжи вахтара газдин ва безиндин къиметар багьа хьуникди пассажирар тухудай маршруткайрин иесийрини агьалийривай къачузвай пулунин къиметар хкажнава.
И кардикай райондин «Куьредин хабарар» газетдиз чпин къуларни алаз са жерге агьалийрилай наразивилин арзадин чар атана.
Райондин центрадиз кIвалахиз хуьрерай гзаф кьадар гьар жуьредин къуллугърин работникар къвезва. Районда хсуси машинар гзаф хьанватIани виридан кIаник абур квач.
Патал хуьрерай – СтIалрилай, СтIал-къазмайрилай, Герейханован хуьрерай, Курхуьрелай ва мадни масанрай инсанар гзаф къвезва.
ГъвечIи къуллугърал алай работникрин мажибар, лагьайтIа, агъузбур я, а къвезвай мажибрин са пай рекьериз акъатзава, я кIвалах тавунани жезвач.
Гьукуматди акъудзавай «Газель» маршруткадин къене 13 чка, «Баргузинда» адалайни тIимил чкаяр къалурнава, амма вучиз ятIани, машинрин иесийри, ана 2-3 чкаяр артух эцигзава, яни къулайсузвал яратмишзава.
И кIвалахдин вилик пад я полициядин КПП-рал алай къуллугъри, я абурал гуьзчивал тухудай ксари кьазвач. Имни сиви-сивди инсанрай ацIанвай «Маршрутка» хатасузвилин рекьиз ракъурун жезва.
Гьарда вичиз кIандайвал къиметар хкажун са къайдани туш. Эгер къиметар хкажзаватIа вичин гьар са километрдиз гудай пулдин кьадар хьун герек я. Махачкъаладин «Южный» автостанциядилай 1-Махачкъаладиз 15-20 км. мензилдиз 14 манат къачузва, Кьасумхуьр-Сбербанк (3 км. авачиз) 13 манат къачузва, имни инсаф туш эхир.
Чаз чпин къуларни алаз са шумуд хуьряй Джаватова, Османовади, Керимханова, Мамедова, Насрулаева, Мусаевади, Ибрагьимова ва мадни чарар ракъурнава.
Ихьтин татугай гьаларал гуьзчивал тухузвай чиновникривай чна «Маршруткайрин» багьа авунвай къиметар къайдадиз хкун тIалабзава. Мисал яз, исятда Кьасумхуьрелай АгъастIал-къазмаяр – 20 манат, Герейханован хуьруьн 1-отделенидиз -25 манат, Советское хуьруьз -40 манат, Дербентдиз 100 манат хьанва. Ихьтин багьа къиметар амай вири хуьреризни хьанва. И авай гьал амукьайтIа, чавай кIвалахрал, я тахьайтIа са дердидизни къвез хьун четин я, - кхьизва арзада.
В. Жамалдинов
