Дагъларин уьлкведа, муниципалитетрикай сифтебурукай яз, «Сулейман-Стальский район» муниципальный тешкилатда 2007-2008-йисарилай башламишна эцигунрин, хуьруьн майишатдин ва маса хилериз кьилдин ксарин инвестицияр желб ийиз эгечIна, и кар гилани давамзава.
Ида вичин хъсан нетижани гана: райондин хуьрера промышленностдин чIехи кархана тир «Мевер» завод, генерал-майор Мегьамед-Гьанифа Шайдаеван тIварунихъ галай спортдинни кIелунин Центр (Цмурдал), Алкьвадар Гьасан-эфендидин музей, дзюдодинни самбодин (Кьасумхуьрел), Азим Алимован тIварунихъ галай (Сардархуьре) спортдин школаяр, хуьруьн майишатдин са шумуд кархана ва маса объектар кардик акатна.
Дагъустан Республикадин Президент Рамазан Гьажимурадович Абдулатипова районда тухузвай инвестиционный политикадин тереф хуьзва, идан гьакъиндай ада республикада тухвай са шумуд мярекатдал лагьана ва район маса муниципалитетриз чешне яз къалурна.
Муниципальный райондин Кьил Нариман Шамсудинович Абдулмуталибова райондиз кьилдин ксарин инвестицияр желб авунин кIвалах давамарзава, адан менфятлувал йисандавай-суз артухарзава, инвестиционный цIийи проектар кардик кутазва.
Эхиримжи йисара районда хъсанвилихъ хьанвай дегишвилери, гьабурукай яз район абад, адан агьалийрин яшайишдинни дуланажагъдин шартIар хъсан хьун патал инвесторрикай менфят къачуни, неинки республикадин, гьакI федеральный массовый информациядин такьатрин векилрин фикир районда тухузвай кIвалахри, агалкьунри, гъиле кьунвай проектри чпел желбзава. Гьавиляй СМИ-дин векилар – журналистар мукьвал-мукьвал райондиз мугьман хьун дуьшуьшдин кар туш. ИкI, алатай гьафтеда райондиз «Дагъустан» РГВК-дин журналистар атана. Адан метлебни кьилдин ксарин инвестицийрин такьатралди кьилиз акъуднавай кIвалахар ва гъиле авай инвестиционный проектар раиж авун, гьакIни райондиз мадни алава инвесторар желб авун тир.
Муниципальный райондин администрациядин эцигунрин ва яшайишдинни коммунальный майишатдин отделдин руководитель Низами Аслановахъ галаз чун («Дагъустан» РГВК-дин, «Касумкент – КТВ» телевиденидин ва «Куьредин хабарар» газетдин журналистар) инвесторрин такьатралди эцигнавай ва эцигиз гъиле авай са шумуд объектдал фена. Ингье, чун Махачкъалада кардик квай эцигунрин «Трон» фирмадин руководитель Сагьиб Акимович Алимова вичин хайиди тир Сардархуьре эцигнавай спортдин школада ава. Гегьенш, гуьрчег и дарамат акурла рикIик шадвал акатзава.
- Зи стха Сагьиба спортшколадин дарамат 2011-йисуз эцигиз гъиле кьуна ва алай йисуз эцигна акьалтIарна, - лугьузва «сельсовет Алкадарский» хуьруьн поселенидин кьил Азим Алимова. – И кардик, 500 агъзур манат пул гуналди, яд гъуналди, элкъвена ракьун жугъунар эцигуналди, хейлин маса кIвалахар тамамаруналди, райондин руководстводини вичин пай кутуна.
Малум хьайивал, алай вахтунда спортшколада неинки Сардархуьряй, гьакI Сулейман-Стальский, Хив районрин маса хуьрерай тир 100-далай виниз жаванрини жегьилри женгинин самбодай, залан атлетикадай, ушу-саньдадай, дзюдодай вердишвилер къачузва, чпин устадвал хкажзава. И кар патал спортшколада спортсменриз вири жуьредин шартIар яратмишнава.
Спортшколада мукьвал-мукьвал спортдин жуьрейрай турнирар, чемпионатар тухузва. Мисал яз, ина къайдаяр авачир женгерай Дагъустан Республикадин чемпионат кьиле тухвана.
Районда кьилдин ксарин инвестицийралди эцигиз гъиле авай спортдин чIехи объектрикай сад, гьелбетда, КIварчагърин хуьре эцигзавай спортдинни сагъламвилин комплекс я.
- Чи поселенидик кьуд хуьр – КIварчагъар, НуьцIуьгъар, Экенар ва Зизикар акатзава, анра 1400-далай виниз хзанар яшамиш жезва, - лугьузва «сельсовет Карчагский» хуьруьн поселенидин кьил Асланбег Сефибегова. – Хуьрера боксдай, азаддаказ кьуршахар кьунай, волейболдай, футболдай филиалар кардик ква. Яни, хуьрера спортдин кIвалахриз екез фикир гузва. Гьавиляй халкьдин кьегьал хва Имам Музамудинович Яралиева КIварчагъа спорткомплексдин дарамат эцигиз гъиле кьунал дередин хуьрерин агьалийри шадвал ийизва ва и баркаллу кардай инвесторриз чухсагъул лугьузва.
Комплексдин эцигунрин кIвалахар «Цициг» тIвар алай эцигунрин фирмади тамамарзава. Объект эцигунин прораб Ражидин Агьмедова чаз лагьайвал, спорткомплексдин дараматдин яргъивал 31, гьяркьуьвални 23 метр я. Ам чIехи залдикай (30 х 15 метр), методический кабинетдикай, тринажерный залдикай, котель-нидикай, чуьхуьдай кабинайрикай ибарат жеда.
Дарамат 2014-йисан октябрдин вацра ишлемишиз вахкун планламишнава.
- КIварчагъ дередин хуьрерин жемятдихъ боксдай иллаки еке агалкьунар жезва, - лугьузва боксдай тренер Альберт Межидова. – Гьич тахьайтIа, зи тербиячийрикай 4 кас жаванрин арада Кеферпатан Кавказдин Федеральный округдин, 13 кас Дагъустан Республикадин кIвен-кIвечивал патал тухвай акъажун-рин гъалибчияр, 10 кас призерар ва 4 касни Вирироссиядин тур-ниррин чемпионар я. Спортшкола кардик акатайла ана неинки боксдай, гьакI кьуршахар кьунай, кьезил атлетикадай, футболдай, волейболдай ва спортдин маса жуьрейрай вердишвилер гуда. Идалайни гъейри, ана 12-15 касдиз кIвалахдай чкаярни жеда.
Винидихъ гъанвай кьве мисалдай аквазвайвал, жумарт, мерд инсанри чпин хуьр-кIвал, район, жемят патал баркаллу крар ийизва, районда инвестиционный проектар кардик акатзава. Идай районэгьлийри инвесторриз чухсагъул лугьузва.
Хазран Кьасумов
