Гьар са вахтунихъ вичин кьет1енвилер ава. Ингье, зулун сифте варз тир сентябрни алукьнава.
Им чуьлдин к1валахрин, кьилди къачурт1а, йисан кьиляй-кьилиз зегьмет ч1угуна арадал гъанвай бегьер-емишар, ципиц1ар, салан майваяр, бустанрин няметар к1ват1 хъийидай къизгъин вахт я.
- Алай вахтунда райондин хуьруьн майишатдин карханайрин, лежбервилинни фермервилин майишатрин, ЛПХ-рин зегьметчийрин, арендаторрин къайгъуярни къалин я, - лагьана чаз «Сулейман-Стальский район» муниципальный райондин хуьруьн майишатдин управленидин начальник Мегьамедзагьид Бабаева. – ИкI, и йикъара райондин карханайра, арендаторрин участокра вири къуватар ципицIар вахтунда ва пучвилер авачиз кIватI хъувунал желбнава.
Районда «Зардиян», «Карчаг», «Дере», «Заря» СПК, «Кюре» ПО, «Садыков» КФХ, «Дар» СПК, гьакIни Эминхуьре, ЦIийи Макьарал, КIварчагъ дередин хуьрера са шумуд кас арендаторар уьзуьмчивилел машгъул жезва.
Санлай къачурла, районда хуьруьн майишатдин карханайрихъ, КФХ-рихъ, арендаторрихъ 1077 гектар уьзуьмлухар ава, абурукай 651 гектар бегьердал атанвай, амайбурни жегьил уьзуьмлухар я.
И йикъара чун Эминхуьруьн территорияда кардик квай уьзуьмчивилин майишатриз ва арендадин участокриз фена, анра ципицIар кIватI хъийизвай гьалдихъ галаз таниш хьана.
Ингье, чун Эльмира Агъамирзоевадин арендадин участокда ава.
- Зи кIвачихъ бегьердал атанвай 8 гектар уьзуьмлухар гала, - лугьузва Э. Агъамирзоевади. – Квез аквазва хьи, тегьенгрик ципицIрин хъсан бегьер дигмиш хьанва. ЦIи анрин гьар са гектардай 90 центнердилай тIимил тушиз ципицIар кIватI хъувун планламишнава.
Уьзуьмлухра гьар юкъуз 13-15 кас рабочияр кIвалахдик ква. Рабочияр тир Гуьлнара Исмаиловади, Пакизат Демировади, Нарима Тагьировади, Зарема Меликовади, Саният Къурбановади, Нурижат Къурбановади, Афисат Рамазановади ва масабуру йикъа 350-400 килограмм ципицIар атIузва.
Райондин Собранидин депутат, тежрибалу уьзуьмчи Миламудин Мегьамедован участокдани кIвалахар къизгъин тир. Адахъ 8 гектар уьзуьмлухар ава. Фад дигмиш хьайи сортарин ципицIар атIана, арендаторди гьа чкадал муьштерийриз маса гана. Чехирдин сортарин ципицIар Дербентдин коньякрин комбинатдиз вахкузва.
Вичи саки 25 йисуз «Аламишинский» совхозда бригадирвиле ва агрономвиле кIвалах авур Алимет Алагьвердиевахъ арендадин 12 гектар уьзуьмлухар ава. Анрин гьар са гектардай ада гьар йисуз 130-150 центнер ципицIар кIватI хъийизва. ЦIини гьа кьадардин бегьер вахчудайдахъ А. Алагьвердиев инанмиш я. ЦипицIар кIватI хъувунал гьар юкъуз 20-дав агакьна рабочияр, кьве машин машгъул я.
«Аламишинский» ГУП-да, Славик Кьасумован, Самур Гьамзатован, Нумрудин Ферзалиеван арендадин участокрани ципицIар кIватI хъувунин кIвалахар хъсан тешкиллувал аваз кьиле физва.
Райондин хуьруьн майишатдин управленидин начальник Мегьамедзагьид Бабаева чаз лагьайвал, алай йисуз районда 6000 тонндилай тIимил тушиз ципицIар кIватI хъувун планламишнава.
Хазран Кьасумов
