Девирдилай, уьмуьрда кьиле физвай вакъиайрилай наразивалдай инсанрихъ галаз шериквал ийиз кIандач заз.
Фикир це тIебиатдин гуьзел шикилриз, инсанри ийизвай кIвалахриз, вун яшамиш жезвай хуьре, районда кьиле физвай дегишвилериз, аквада хьи, шадвалдай крар-кIвалахар чахъ бес кьадар ава. Кьасумхуьр, санлай район аваданламишунин кIвалахар кьиле тухузвай майдандиз элкъуьн – бес им дамахдай, шадвалдай кар тушни?!
- Эхиримжи вахтара Кьасумхуьруьн центрада, гьакIни «ЦIийи хуьр», «Шагь багъ», «Тахта» ва «ПМК» микрорайонра эцигунрин, аваданламишунин, рекьерни куьчеяр, цин хуьлер къайдадиз гъунин, цIийиз арадал атанвай куьчейриз газ, эквер, хъвадай яд тухунин кIвалахар тамамарзава, - лугьузва «сельсовет Касумкентский» хуьруьн поселенидин кьил Брем Бремова. – Вири и кIвалахра чаз райондин руководстводин, маса къуллугърин патай еке куьмекни ава.
Гьакъикъатдани, райондин центр къвердавай чIехи ва гуьрчег жезва. ЧIехи чкада чIехи къайгъуярни жеда – им якъин кар я. Тек са алай йисан алатнавай вахтунда «Шагь багъ» микрорайонда 1000 метрда куьчейра газдин линияр тухвана, 160 КВА-дин трансформатор эцигна, ЦIийи хуьре 8 куьчеда асфальт туна, шегьре рекье ва куьчейра 120-далай виниз йифен вахтунда экв гудай фонарар (кобраяр) эцигна ва аваданламишунин рекьерай хейлин маса кIвалахар тамамарна.
И йикъара Мегьарамдхуьруьн районда кардик квай «Югагропромдорстрой» ООО-дин махсус бригадади ЦIийи хуьре Бакудин 26 Комиссардин, Комсомолдин 50 йисан ва Леонован тIварунихъ галай куьчейра асфальт тунин кIвалахар давамарзава. Райондин архитектор Герман Гьуьсейнова чаз лагьайвал, санлай и куьчейра 3000 квадратный метрдин майданда асфальт твада. 2000 квадратный метрда и кIвалах тамамарнава.
Лагьана кIанда, баркаллу и кIвалах инвесторрин ва куьчейра яшамиш жезвай агьалийрин пулунин такьатралди тамамарзава.
ЦIийи микрорайонрин агьалияр хъвадай целди таъминарунни эвелимжи везифайрикай сад я. И рекьяйни райондин ва хуьруьн поселенидин администрацийри кIвалахни тухузва. ИкI, мукьвара 17 вилин муькъуьнни ЦРБ-дин дараматдин арада, шегьре рекьин къерехда, къуй яна, анал 24 тонн яд гьакьдай цистерна эцигна. Алай вахтунда и цистерна эцигнавай чкадилай ЦIийи хуьруьн кьилихъ (ЦРБ-дин кIанихъ) кьван 1000 метрда цин линия тухузва. ЦIийи къуйдин ци са шумуд куьчедин агьалияр хъвадай целди таъминарда.
«сельсовет Касумкентский» хуьруьн поселенидин кьил Брем Бремова чаз лагьайвал, цистерна къачуниз, эцигуниз ва цин линия тухуниз саки 250 агъзур манат пул акъатна. ЦIийи хуьре сад 16, муькуьдини 9 тонндин кьве цистерна виликдайни эцигайди я.
Кьасумхуьруьн центрдал ва адан микрорайонра аваданламишунин, эцигунрин кIвалахар давамни жезва.
Хазран Кьасумов
