Акьалтзавай несил сагъламди яз чIехи авунин ва тербияламишунин карда гатун вахтунда аялрин ял ягъун тешкилунихъ зурба метлеб ава. И кардин важиблувал райондани рикIелай алудзавач.
Ина гьар йисуз гатун рухсатрин вахтунда аялар патал сагъламвилинни ял ягъунин лагерар тешкилзава, аялриз чи республикада авай лагерра ял ядай шартIар тешкилзава. Гьина, мус ва гьикьван аялри республикадин лагерра ял язаватIа чирун патахъай чун райондин УСЗН-дин хзандин ва аялрин отделдин заведующий Магьмудова Шамсиятахъ галаз гуьруьшмиш хьана.
ЦIинин гатуз, гзаф маса чкайрай къвезвай аялрихъ галаз санал, чи райондин аяларни «Рубас», «Южный», «Юный» лагерриз ял ягъиз ракъурнава.
Абурни чпин мажибар гъвечIи, тIимил таъмин тир, гьакIни гзаф аялар авай ва тамам тушир хзанрин гъвечIи векилар я. Абуру анра ялни язава ва чпин сагъламвални мягькемарзава,-жаваб гана чаз Ш.Магьмудовади.
-ИкI, сад лагьай сменада чи райондин аялри 11-июндилай 30-июндалди Авадан хуьре «Юный» лагерда 10 касди ва «Рубас» лагердани 20 касди ял яна.
Исятда кьвед лагьай сменадиз 5-июлдилай 25-июлдалди чна «Южный» лагердиз ял ягъиз 20 аял рекье тунва.
И важиблу кIвалахда чаз райондин администрациядини еке куьмек гузва.
Аялрин диде-бубаярни и кардилай гзаф рази я,-лагьана ада чи суьгьбетдин эхирдай.
Асият Мусаева
