«Сулейман-Стальский район» муниципальный райондин территорияда аваданламишунин ва михьивилер авунин кIвалахар тухунин серенжемрин сергьятра аваз райондин центрадал, гзаф хуьрера хейлин кIвалахар кьилиз акъуднава, и кар давамни ийизва.
Кьилди къачуртIа, райондин центрадал (ЦIийи хуьре) са шумуд куьчеда асфальт цанвайдакай, столбайрал йифен вахтунда экв гудай «кобраяр» туьк1уьрнавайдакай, ЦРБ-дилай сбербанкдин патав кьван парк-аллея туьк1уьрнавайдакай ва ихьтин маса кIвалахрикай «Куьредин хабарар» газетдиз са шумуд макъалани акъатнай. Идахъ галаз санал, районда михьивилер хуьнин рекьерайни хейлин кIвалах тухванва. ИкI, гзаф чкайрал зирзибил вегьедай контейнерар эцигнава, анриз вегьей зирзибил тухвана тайинарнавай чкайрал гадарун тешкилнава. Эхиримжи вахтара райондин центрадал ва хуьрера кьилин куьчейра, общественный дараматрин патарив зирзибил вегьидай урнаярни эцигзава. Кьилди къачуртIа, Кьасумхуьрел са шумуд чкадал, ЦIийи хуьре парк- аллеяда, Герейханован хуьре кьилин куьчеда урнаяр эцигнава.
Общественный чкайра, дараматрин патарив, рекьера ва куьчейра урнаяр эцигунин кIвалахар алай вахтунда Кьасумхуьрел давам жезва.
-Эхиримжи вахтара райцентрадал михьивилер авунин, аваданламишунин, къелемарни гьамиша къацуз амукьдай кул-кусар акIурунин рекьерай хъсанвилихъ дегишвилер кьиле фейиди къейд авун лазим я,-лугьузва «сельсовет Касумкентский» поселенидин кьил Брем Бремова.-Урнаяр эцигун аваданламишунин, михьивилер авунин рекьерай кIвалахар давамарун яз гьисабиз жеда.
Чаз акурвал, 17 вилин муькъвелай центральный майдан галайвал къвезвай рекьин къерехра, административный дараматрин, почтадин патарив, культурадин Дворецдин гьаятда са шумуд чкадал урнаяр эцигнава.
Брем Бремова чаз лагьайвал, мукьвара мад 40 урна чкадал хканва, абур эцигунин кIвалахар кьиле тухузва. Кьилди къачуртIа, и йикъара Кьасумхуьрел муькъуьвай мискIиндив кьван къвезвай рекьин къерехра (Ленинан тIварунихъ галай куьчеда) ва ЦIийи хуьре Ислягьвилин куьчеда (муькъуьн патав гвай къекъуьндилай (кольцодилай «Лейла» банкетрин залдин патав кьван) урнаяр эцигзава.
Лагьана кIанда, урнаяр эцигдай чкаяр виликамаз тайинарнава. ИкI, райондин администрациядин эцигунрин ва ЖКХ-дин управленидин начальник Герман Гьуьсейнова чаз лагьайвал, Кьасумхуьр-Дербент рекьин къерехра эцигнавай кьурарин патарив, «Терсепул» базардин, ЦРБ-дин, парк-аллеядин, туьквенрин патарив, майдандал, Ломоносован, Школьная, Гьасанован куьчейра, В.И.Ленинан памятникдилай Цмурдал ва Кьурагь районриз физвай рекьер чара жезвай чкадал кьван куьчеда, гьакIни общественный чкайра 70-дав агакьна урнаяр эцигда.
-Мисалда лугьузвайвал, михьивал сагъламвилин замин я,-лугьузва яшар 80 йисалай алатнавай Рафим Селимова.-Кьасумхуьрел, санлай районда михьивилер хуьнин, аваданламишунин рекьерай еке кIвалах тухунай райондин руководстводиз чухсагъул. Михьи чкада къекъуьнни, михьи чкадал ацукьунни гуьгьуьл ачух жедай кар я. Гила инсанар акъваззавай, ацукьдай скамейкаяр эцигнавай чкайрал, рекьерин къерехра урнаяр эцигзава. Имни хъсан кар жезва. Инсанри пIапIрусрин кьатIар, чар-затI какатай чкайрал гадар тавуна, урнайриз вегьенайтIа, хъсан жедай. Им, гьич тахьайтIа, михьивилер хуьнин карда райондин руководстводи тухузвай кIвалахдиз куьмек гун жедай.
Хазран Кьасумов