Са шумуд кас алай чкадал садра за лагьанай: «Журналиствилин пеше кьетIенди я, ада маса касди фикир тагудай кар-кIвалах кьатIуда, дуьшуьшдай ам чин тийидай касдихъ галазни таниш жеда». Вирида зи тереф хвеначир.
Мукьвара хьайи са дуьшуьшди зун за лагьай келимайрин гьахъвилин фикирдал хкана.
Алатай киш юкъуз зун ЦРБ-дин «Тади куьмек» отделенидиз гьахьзавай варцин патав акъвазнавай. Шегьредихъай атай «Жигули» анал акъвазарна, адай са кьадар яшар хьанвай кьве дишегьли эвичIна.
-Машаллагь, машаллагь, и крар авурбуруз баркалла!- чиле цанвай асфальтдиз, ЦРБ-дин дараматдиз ва куьчеда авай яшайишдин кIвалеризни общественный дараматриз вил яна, и патаз, а патаз килигуналди, лагьана яшлу дишегьлиди.
За гьасятда кьатIана: дишегьли паталай атанвайди я, хуьр гуьрчег хьуни, куьчейра асфальт цуни ам гьейранарнава, шадарнава.
Ихьтин гуьруьш гьи журналистди гъиляй ахъайда кьван?!
-Зун, чан стха, Баку шегьерда яшамиш жезвай Мустафаева Мазифат я,- зи суалдиз жаваб яз, танишвал гузва яшлу дишегьлиди.- Зи ери-бине Етим Эминан ватан тир Ялцугърин хуьряй я, Бакуда яшамиш жез 50 йисалай виниз я. И патарихъни хтун тавуна 10-15 йис тир. Больницадизни зун ана кефсуз яз къатканвай мукьва-кьилидал кьил чIугваз атанвайди я. Хъсанвилихъ дегишвилер хьанва районда! За и кардал шадвал ийизва. ЦIийи хуьруьн куьчейра асфальт цанва, инал къведайла заз акурвал, больницадилай агъадалди, шегьре рехъ тирвал, парк-аллеяни туькIуьрнава. Заз лагьайвал, муниципальный райондин Кьил яз жегьил итим, хъсан руководитель Нариман Шамсудинович Абдулмуталибова кIвалахзава, дегишвилерни адан чалишмишвилерихъ галаз алакъалу я. Заз ам акур, чидай кас туш. ЯтIани, ихьтин хъсан крар авунай заз адаз аферин ва баркалла лугьузва.
Гъурбатдай хтанвай, ери-бине тир ватанда мублагьвал, абадвал хьана кIанзавай М.Мустафаевадин келимайрихъ дикъетдивди яб акалай зун мад сеферда ЦIийи хуьруьн асфальт цанвай куьчейра къекъуьн хъувуна (За куьчейра асфальт цуникай газетда макъала кхьенай). Чаз акурвал, ЦIийи хуьруьн Р.Гьажиевадин, Жаруллаеван, Кирован, Ломоносован тIварарихъ галай, Пионерская, Больничная, Международная, Кавказская куьчейра, ЦРБ-дин патав туькIуьрнавай парк-аллеяда, шегьредилай куьчейриз гьахьзавай хивера асфальт цанва.
И кIвалахриз райондин бюджетдай 10857 агъзур манатдилай виниз пул ахъайна.
Шад жедай кар я хьи, райондин руководстводи гъиле кьур баркаллу и кардин тереф спонсорри ва хуьруьн гзаф агьалийри хвена, абуруни куьчейра асфальт цуник чпин пай кутуна. Кьилди къачуртIа, и кардик РФ-дин Государстводин Думадин депутат Мамед Абасова (ада вичин пулунин такьатралди Кирован куьчеда 2240 квадратный метрдин майданда асфальт цана), хуьруьнвияр тир Эмирали Эмиралиева, Имамудин Идрисова ва масабуру еке пай кутуна.
Санлай къачурла, асфальт цанвай майданди 23361 квадратный метрдин майдан тешкилзава. КIвалахар куьруь са вахтунда ва еридивди кьилиз акъудайди Мегьарамдхуьруьн райондин Ярагъ Къазмайрал кардик квай «Югагропромдорстрой» ООО я.
-Гьелбетда, ЦIийи хуьруьн куьчейра асфальт цунал ва ял ядай парк-аллея туькIуьрунал агьалияр разини я, шадни,- лугьузва и хуьруьнви Гьажимет Тагьирбегова.- Идай хуьруьн вири жемятди райондин руководстводиз, кьилди Нариман Шамсудинович Абдулмуталибоваз чухсагъул лугьузва.
Гьакъикъатдани, хъсан крари разивилин гьиссер арадал гъида. Разивилин келимаяр чаз са шумуд касдивай ван хьана. Амма…Чаз, гьайиф хьи, гуьгьуьл чIурдай «шикилни» акуна. ИкI, парк-аллеяда эцигнавай скамейкайриз янавай ширедал цIархар авунва, инал-анал (урнаяр эцигнават1ани) пIапIрусдин кьатIар гадарнава. Еке пулунин такьатар харжна, зегьметар чIугуна, агьалийриз къулай хьурай, гуьрчег акурай лагьана туькIуьрнавай чкаяр икI чиркинарун, къайдасуз ийиз алахъун дуьз кар жезвани?
-Ибур я Аллагь, я инсанар рази жедай крар туш,- лагьана чаз вичи яргъал йисара районда жавабдар къуллугърал кIвалах авур зегьметдин ветеран Шихбуба Шихбабаева.- Гзаф крар авунвай ва кьилиз акъудун патал хейлин крар, кIвалахар гъилени кьунвай райондин руководстводиз куьмек гун, ийизвай хъсан крарин тереф хуьн гьар са районэгьлидин буржи хьун лазим я.
Райондин кьилин архитектор Герман Гьуьсейнова чаз лагьайвал, райондин центрадал куьчейра асфальт цун-им мукьвал тир гележегдин йисара районда хуьрер аваданлами-шунин программада къалурнавай кIвалахрив эгечIун яз гьисабиз жеда. Пландик вири хуьрер аваданламишун, рекьер, куьчеяр къайдадиз гъун кутунва.
Мад са кар къейд ийиз кIанзава. ЦIийи хуьруьн куьчейра асфальт цуник пай кутур вири инсанриз райондин руковод-стводи чухсагъул лугьузва.
Эхь, эхиримжи вахтара район эцигунрин, аваданламишунин кIвалахар тухунин майдандиз элкъвенва. Вун мадни мублагь, авадан хьурай, хайи макан-СтIал Сулейманан район!
Текст кхьейди ва шикил ягъайди Хазран Кьасумов я.
