1993-йисуз машгьур «Касумкентский» совхоз чукIурна, адан чилер, багълар инсанриз пайна. Мамеев Эседулагьал багъ авай 75 сотых чил гьалтна.
- Гзафбуру чпел гьалтай багълар туна, за лагьайтIа, чIуру гьалдиз атанвай багъ хкудна, - лугьузва Э. Мамеева. – Сифтедай анаг автогрейдердалди дуьзарна, ана дериндай плантаж къарагъарна, хъсан сортарин къелемар гъана, ичинни чуьхверин цIийи багъ кутуна. И кар патал заз республикадин хуьруьн майишатдин министерстводи куьмек яз 21 000 манат пулни ахъайна.
И багъдин бинедаллаз гуьгъуьнилай Э. Мамеева «Молот» тIвар алаз хуьруьн майишатдин кооператив (СПК) тешкилна.
Чаз акурвал, иесивилелди гелкъуьн тешкилнавай багъ хъсан гьалда ава. Къелемарни гьяркьуь араяр туна, техника ишлемишиз жедайвал цанва. Тарарин пунариз пер янава, багъдин чIехи паюна кьурай ва герек авачир хилер атIанва.
Э. Мамеева лугьузвайвал, багълара агротехникадин серенжемар кьиле тухудайла ада «Приусадебное хозяйство» журналдикайни менфят къачузва.
Тежрибалу багъманчиди вичин участокдай гьар йисуз ичерин ва чуьхверрин тарифдин бегьерни кIватI хъийизва.
Х.Кьасумов