«Россельхозцентрдин» пешекаррин ахтармишунри къалурзавайвал, эхиримжи йисара гьавайрин шартIариз килигна, вири хуьруьн майишатрин чилера – векьин уьруьшра, малар хуьзвай чуьллера, магьсулар цанвай никIера, багълара, уьзуьмлухра, рекьерин, къаналрин къерехра кьиферин кьадар къвердавай артух жезва.
Кьифери гузвай зиян са техил ва я маса шейэр тIуьналди туш, абуру гьакIни бязи вахтара са кьадардин хуьруьн майишатдин набататар авай никIер, багълар ва уьзуьмлухар тергзава.
Кьиферин вилик пад кьун патал никIера, багълара, уьзуьмлухра гьар жуьре серенжемар кьиле тухвана кIанда: цанар цун, перер ягъун, ятар гун ва масабур, гьакIни химиядин ва биологиядин дарманар ишлемишун герек къвезва.
Химический серенжемрикай ихьтин дарманар ишлемишна кIанда: клерат, бродифакум, бродират, морторат, варат, норат, изоцин, крысиная смерть ва масабур.
Лугьун лазим я, винидихъ къалурнавай химиядин дарманар ишлемишиз хьайитIа, абур къушариз, чуьлдин ва кIвалин гьайванриз хаталу я, гьаниз килигна, дарманар кьиферин тIеквенра туна кIевирна кIанда.
Биологический дарманрикай республикадин «Россельхозцентр» идарадин филиалда гьазурзавай «бактороденцид влажный зерновой» ишлемишна кIанда. Гьа и дарман ишлемишдайла кьиферин «хуьрерик» тиф азар акатзава ва гьабур терг жезва.
Идалай гъейри, бактороденцид дарман тIебиатдиз, гьайванриз, къушариз ва инсанриз хаталу туш.
Герек тир дарманар райондин «Россельхозцентрдин» отделдин пешекарриз заказ гуз жеда.
