Къени рехъни чIуру рехъ аялзамаз чир хьун хъсан кар я. И кIвалах тайинарайла, бахтунин рехъ аквазва.
Нуралиев Къурбан Цмуррин хуьруьн умуми образованидин юкьван школадин 8-классдин ученик я. Ада алай кIелунин йисан сад лагьай пай лап хъсан къиметар аваз акьал-тIарнава. Тарифдин кIелунихъ галаз санал адаз хъсан ахлакьни ава. Гьавиляй адаз классдин, вири школьникрин арада , муаллимрин коллективдин патай, къуни-къуншийрин ва са акьван екеди тушир, хуьруьн жемятдин арадани лайихлу гьуьрмет ава.
Къурбанан асул кеспи тир кIелунин кардикай азад вахт лишанлудаказ физва. Ам рикIивай спортдал машгъул жезва. Ада боксдай секцийра, са декьикьани ахъай тийиз, чешне къалурзава, рикIивай зегьмет чIугвазва.
- Нуралиев Къурбан, - лугьузва и секция тухузвай жегьил тренер Алибеков Шамила, - гележег авай спортсменрикай сад я. Ам боксдал машгъул яз хьанвайди кьве йис я. Ада вичин заланвиляй Огни, Дербент шегьерра, КIварчагърин хуьре кьиле фейи акъажунра анжах сад лагьай чкаяр къазанмишна.
И йикъара Къурбан, Огни шегьерда Кьиблепатан зонадин жаванрин арада Дагъустан Республикадин кIвенкIвечивал патал кьиле фейи турнирда иштиракна, хтанва. Анай ада 35 килограммдин заланвиляй сад лагьай чка кьурвилин гьакъиндай шагьидвалзавай грамота хканва. Ихьтин грамотаяр, дипломар адахъ мадни гзаф ава.
Ада дидедин тапшуругъар ян тагана, кьилиз акъуддай, анжах къени кIвалахрик вичин пай кутадай. Къурбанав гвайди къени рехъ я. Къени рекьевайди бахтунин экуьник жеда.
Саламалейккм красавчик я рад за свой народ генани агалкьунар хьурай чин хуьруьн жегьилриз