Малум тирвал, Кьасумхуьруьн 3-нумрадин самбодинни дзюдодин спортшколадин жегьил спортсменрихъ йисалай-суз хъсан нетижаяр жезва . И кардик, гьелбетда, анин машгьур тренерар- преподавателар тир стхаяр- Къурбановрин зегьметдин еке пай ква.
Алай йисан декабрдин сифте йикъара Владимир шегьерда Александр Невскийдин кубок патал самбодай Вирироссиядин турнир кьиле фена. Дагъустандин хкянавай командадин къурулушдик кваз ана чи райондайни 3 касди иштиракна.
Къизгъиндаказ кьиле фейи и акъажунра 82 килограммдин заланвиляй гьасирдал экъечIай 34 спортсмендин арада, 5 сеферда гъалибвал къазанмишуналди, чи бажарагълу пагьливан Ибрагьимов Замира (тренер самбодай мастеррин арада дуьньядин чемпион Къурбанов Рамазан) 1-чка кьуналди, самбодай Россиядин спортдин мастервилин тIвар къазанмишна. Адаз кубок, къизилдин медаль, грамота ва цлан чIехи сят гана.
Чи мад са бажарагълу спортсмен тир Керимов Муслима 68 килограммдин заланвиляй (тренер дзюдодай дуьньядин чемпион Къурбанов Тельман) 47 касдин арада 3- приздин чка кьуна. Сефербегов Навруза 57 килограмм заланвиляй 5-6 чка кьуна. Мубаракрай абуруз и чIехи Гъалибвал!
И мукьвара абуру СКФО-дин кIвенкIвечивал патал самбодай Нальчикда кьиле фидай еке акъажунра иштиракда. Чна абур анайни гъалибвал гваз хкведайдак умуд кутазва.