Алай йисан 26-ноябрдиз Кьасумхуьруьн ЦСПСД-дин гьукуматдин идарада дидейрин Йикъаз талукьарнавай шадвилин мярекат кьиле фена.
И мярекат и идарадин хъсандаказ тадаракламишна туькIуьрнавай аялрихъ галаз юкъуз кIвалах тухунал машгъул жезвай отделенидин залда тешкилнавай. И мярекатдиз чеб яшайишдин жигьетдай четин гьалда авай 10 хзандай дидейриз теклифнавай.
Мярекат хъсан тешкиллувал аваз кьиле тухун патал «Дидедин сувар» («Мамин праздник») кьил гана махсус программа туькIуьрнавай. И центрдиз къвезвай аялри дидейриз талукьарнавай манияр лагьана, шиирар кIелна, сценкаяр ва кьуьлер гьазурнавай.
И мярекат аялрихъ галаз юкъуз кIвалахзавай отделенидин социальный педагог Дадашева Раидади кьиле тухвана.
Теклифнавай дидеяр патал ширинлухар алай столар тешкилнавай ва гьар садаз емишрин савкьватар гана. И жигьетдай къаюмвалдайбурун (спонсоррин) куьмекдикай менфят къачуна.
И мярекатдал тади социальный къуллугъдин отделенидин психолог Эскендарова Эльмира, духтур- педиатр Къазанбегова Сижарат, УСЗН-дин хзандин месэлайрал машгъул отделдин заведующий Магьмудова Шамсият, гзаф аялрин диде Загьирова Эмина рахана.
И центрдин пешекарри аниз теклифнавайбур чпи тухузвай кIвалахдихъ, адан нетижайрихъ галаз танишарна.
Анал гьакI и центрда кефсуз аялрин реабилитациядин курс кьиле тухузвай диде-бубаяр чпин яшайишдин четин шартIарал, чпиз и жигьетдай гузвай куьмекдал гегьеншдаказ акъвазна ва и кардилай еке разивал авуна.
И лишанлу вакъиадихъ галаз алакъалу яз и центрда реабилитациядин курс кьиле тухузвай 22 аялдиз 25-ноябрдиз «Там-там» кафеда карчи Исмаилов Вагифа мергьяметлувилин тIуьн гун тешкилна ва гьакIни абур СтIал Сулейманан мемориальный КIвал-музейдиз экскурсиядиз тухвана.
Чна чаз и жигьетдай куьмекар гайи вири карчийриз-спонсорриз- чухсагъул лугьузва. И мярекатда чаз къаюмвилин куьмек гьакI райондин пенсионный фондунин начальник Къачаев Магида, «Сельсовет Касумкентский» муниципальный тешкилатдин кьил Бремов Брема ва «село Куркент» муниципальный тешкилатдин кьил Гьажалиев Радика гана.
Исмаилова Хазира, юкъуз и центрдиз къвезвай аялрихъ галаз кIвалах тухузвай отделенидин заведующий.
Шикил ягъайди Арсен Сефералиев я.
