24-ноябрдиз райадминистрациядин заседанийрин залда райондин агъсакъалрин Советдинни дяведин, зегьметдин ва къайдаяр хуьдай органрин ветеранрин Советдин саналди тир заседание кьиле фена.
Анал алай йисан 15-декабрдиз кьиле тухудай Дагъустандин халкьарин Съезддиз гьазурвилер акунихъ галаз алакъалу яз 3-декабрдиз кьиле фидай райондин конференциядиз делегатар хкягъунин месэладиз килигна.
Заседанидин кIвалахда «Сулейман-Стальский район» муниципальный райондин Кьил Н. Ш. Абдулмуталибова ва Дагъустандин Халкьдин Собранидин депутат Гь. И. Мегьамедова иштиракна.
Заседание райадминистрациядин патав гвай райондин агъсакъалрин Советдин председатель Х. О. Асланова ачухна ва кьиле тухвана.
Ада, заседанидал алай месэладив эгечIдалди, райондин агъсакъалрин Советдин Президиумдин, залда ацукьнавай вири ветеранрин тIварунихъай Абдулмуталибов Нариман Шамсудиновичаз цIийи къуллугъ мубаракна, адахъ уьмуьрда ва вичин хивевай жавабдар кIвалахда еке агалкьунар хьана кIанзавайди лагьана.
Анал гьялзавай месэладай вичин фикирар, кар кьетIдай теклифар гваз райондин агъсакъалрин Советдин председатель Асланов Халилбег Османович куьруь гаф рахана.
Заседанидал чпин теклифар гваз райондин агъсакъалрин Советдин членар тир К. С. Камалов, шаир С. С. Саидгьасанов, дяведин иштиракчи Гь. Къ. Къазимегьамедов, ДР-дин Халкьдин Собранидин депутат, академик Гь. И. Мегьамедов рахана. Абуру Дагъустандин халкьарин садвал ва тупламишвал мягькемарунин, коррупциядихъ, терроризмдихъ ва диндин экстремизмдихъ галаз женг тухунин рекьяй чпин фикирар лагьана меслятар къалурна.
Гуьгъуьнлай анал, ачух сесер гуналди, 3-декабрдиз кьиле фидай райондин конференциядиз райондин агъсакъалрин ва дявединни зегьметдин ветеранрин Советрин патай векилар яз делегатар хкяна.
Эхирдай анал рахай муниципальный райондин Кьил Абдулмуталибов Нариман Шамсудиновича чи райондин агъсакъалриз – камалэгьлийриз – чи райондин экономика, агьалийрин яшайишдин дережа хкажун къазанмишун патал чпин фикирар ва теклифар гваз райадминистрациядиз атун буюрна, абур патал вичин кабинетдин ракIарар гьамиша ачух тирди лагьана, чна чи вири къуватар ва алакьунар са макьсаддихъ – чи райондин экономика, халкьарин агьваллувал хкажунихъ рекье туниз эвер гана.
Заседанидал гьялай месэладай анал талукь къарар кьабулна.
