Алай йисан 20-ноябрдиз «Сулейман-Стальский район» муниципальный райондин депутатрин Собранидин 22-сессиядал ачух сесер гуналди «Сулейман-Стальский район» муниципальный райондин Кьилин къуллугъдал Абдулмуталибов Нариман Шамсудинович хкяна.
Абдулмуталибов Нариман Шамсудинович 1968-йисан 26-октябрдиз Махачкъала шегьерда дидедиз хьана. ЦIийихуьруьн юкьван школа акьалтIарай 1985-йисуз ДГУ-дин филологический факультетдик кIелиз экечIна. 1987-1989-йисара СССР-дин Яракьлу Къуватра къуллугъна. 1992-йисуз ДГУ агалкьунралди акьалтIарна ва 1993-йисуз анин аспирантурадик кIелиз экечIна.
1996-йисалай 2002-йисалди ДГУ-дин Дагъустандин чIаларин кафедрада преподаватель, старший преподаватель яз ва 2002-йисалайни а кафедрадин доцент яз кIвалахна.
1998-йисуз ада кандидатвилин диссертация хвена ва филологиядин илимрин кандидатвилин тIвар къачуна.
2002-йисуз докторвилин диссертация кхьена куьтягьун патал ДГУ-дин докторантурадиз теклифна ва 2005-йисуз анаг кIелна акьалтIарна.
Н. Ш. Абдулмуталибов ДР-дин образованидин ва илимдин рекьяй Министерстводин патав гвай учебно-методический литературадин жигьетдай лезги чIалан комиссиядин председатель, 5 диссертациядин кIвалахрин руководитель, вишелай виниз жуьреба-жуьре макъалайрин, гьа жигьетдай яз илимдин 85, учебно-методический 9, машгьурдай къайдадин 13, гьакIни 4 монографиядин ва кIелдай пособийрин автор я.
2006-2007-йисара милли политикадин, информациядин ва къецепатан алакъайрин рекьяй ДР-дин Министерствода диндин крарин рекьяй Управленидин начальник яз кIвалахна.
2007-йисуз «Сулейман-Стальский район» муниципальный тешкилатдин Собранидин депутатвиле хкяна.
2007-2010-йисара «Сулейман-Стальский район» муниципальный тешкилатдин депутатрин Собранидин Председателдин заместитель яз хьана.
2010-йисан 20-ноябрдиз «Сулейман-Стальский район» муниципальный райондин депутатрин Собранидин 22-сессиядал «Сулейман-Стальский район» муниципальный райондин Кьилин къуллугъдал хкяна.
Эвленмиш хьанва, 2 аял ава.