Милициядин тарих, государстводин къайдаяр хуьдай органрихъ хьиз, чи уьлкведин тарихдихъ галазни алакъалу я. 1917-йисан революциядин къизгъин йикъара арадал атай ам жуьреба-жуьре вакъиайрив ацIанвай баркаллу рехъ фена ва адахъ еке къуватлу, техникадин рекьяй хъсандаказ тадаракламишнавай къуллугъ, тарихдин цIийи шартIара тахсиркарвилерихъ галаз женг чIугваз алакьдай чпин кар чидай пешекарар ва физический жигьетдай лигим хьанвай кадрияр ава.
Вич тешкилайдалай инихъ вилик эцигай везифаяр давамаруналди милициядин работникри вири вахтара халкьдин интересар обществодин хатасузвал, уьлкведин лайихлувал хуьз хьана.
Милициядин къуллугъ гьич садрани секинди ва къайгъусузди хьанач. Ам гьамиша герекди ва хаталуди яз ама. Къе лагьайтIа, ам кьве къат четинди хьанва. МВД-дин личный состав тахсиркарвилерихъ, бандитрихъ ва террористрихъ галаз женг чIугунин вилик цIарцIел ала. Ам гражданрин хатасузвал ва секинвал хуьнин замин яз амукьзава. Чпин асул месэлайрилай гъейри милицияди, сергьятар хуьнин, Дагъустандин территориядиз бандитрин дестеяр атунин вилик пад атIунин кIвалахарни кьиле тухузва.
Жегьил Советрин властдихъ галаз санал арадал атай ам граждан дяведин четин шартIара хейлин четинвилер алудуналди кIвачел акьалтна.
А яргъал тир йисара сифтегьан милиционерриз кIвалахиз гзаф четин тир: алукIдай парталар, недай суьрсет, яракьар бес жезвачир, техникадин такьатар авачир, милициядин хейлин къуллугъчияр савадсуз тир ва абурухъ кIвалахдин тежриба авачир. ГьакI тиртIани, абурухъ тахсиркарвилерихъ галаз женг чIугвадай еке къаст авай. Абур чпин пешедиз ва хайи уьлкведиз вафалу тир.
Милициядин къуллугъчийри Ватандин ЧIехи дяведин йисарани игитвилелди кIвалахна. Неинки фронтра душмандиз ягъунар кьуна, гьакI далу пата истребительный дестейра аваз абур душмандин гъилибанар ва дизертирар кьун патал къати женгериз экъечIна. Бязи вахтара чебни телеф хьайи дуьшуьшар хьана.
Райондин къенепатан отделдиз жуьреба-жуьре йисара хейлин ксари руководство гана. Ингье абурун тIварар: С.Д.Гьамидов, М-С.Н.Насрулаев, М.Тагьиров, Т.Т.Тагьиров, А.Н. Пирисмаилов, О.Я.Оруджев, Х.В.Гьафизов, М.М.Закариев, Э. К. Куьребегов, Н. К. Ильясов, А. М. Мегьамедов, Э. М. Эседулаев ва масабур.
Алай аямдин милициядин къуллугъчийрини винидихъ тIварар кьунвай чпин чIехи юлдашрилай чешне къачуналди, ветеранрин адетар давамаруналди чпин къуллугъдин буржи викIегьвилелди ва ян тагана, ял ядай ва суварин йикъар авачиз бандитрин дестейрихъ галаз женг чIугвазва.
Алай вахтундани къуллугъдин везифаяр тамамардай вахтунда къалурай викIегьвилерай ва жуьрэтлувилерай цIудралди Дагъустандин милициядин къуллугъчияр государстводин наградайриз лайихлу хьана.
Вичин къуллугъдин везифаяр тамамардайла бандитрин гъилелай игитвилелди телеф хьайи кьегьал хва, майор Жарулаев Дуньямудин Нажмудинович, Къазиагьмедов Роберт Абидинович «Орден Мужества» гуниз лайихлу хьана.
Чухсагъулдин гафар ветеранрини къазанмишзава. Абуру чпин уьмуьрдин лап хъсан йисар милицияда къуллугъуниз бахшна ва исятдани абуру жегьил несил тербияламишун давамарзава.
Милициядин къуллугъчийри чпин сувар лап четин вахтунда къаршиламишзава. Заказна инсанар яна кьин, хъиткьинарунар, диверсияр, къайдаяр хуьдай къуллугъчийрал гьужумар авунар гьар йикъан кIвалахдиз элкъвенва.
Къе къенепатан крарин органрин къуллугъчийрин вилик гьихьтин жуьредин хьайитIани тахсиркарвилериз акси акъвазун, чи гражданрин хатасузвал хуьн таъминарун, терроризмдиз ва экстремизмдиз, тешкиллу тахсиркарвилериз, законсуздаказ наркотикар маса гуниз акси акъвазун, инсанар куьч жезвай къайдайрал гуьзчивал авун ва жаванрин арада къайдаяр чIурунин вилик пад кьун, шегьерра ва хуьрера секинвал ва къайдаяр хуьн патал женг чIугун, обществода ислягьвал ва абадвал хуьн таъминарун акъвазнава.
Виридалайни кьилин месэлайрикай садни милициядин тIвар, адахъ агьалийрин патай авай ихтибар хкажун яз амукьзава.
Чи уьлкведин руководстводи эхиримжи йисара милициядин кIвалах мадни гужлу ва таъсирлуди, девирдин истемишунриз жаваб гудайди авун патал милициядин работникрин хатасузвал хуьн таъминарунин, абурун кIвалахдинни яшайишдин шартIар хъсанарунин, материально-технический база мягькемарунин жигьетдай са жерге кар кьетIдай серенжемар кьабулзава. И еке къайгъударвилиз жаваб яз милициядин работникри чпин кIвалах мадни хъсанардайдал шак алач.
Асият Мусаева, РФ-дин журналистрин Союздин член
