Вичикай, уьмуьрда фейи рекьикай Эминхуьре яшамиш жезвай хипитIарви Къадиров Мегьамеда куьрелди икI лугьузва: «Зун зегьметчи хзанда хьана, яргъал йисара производствода кIвалах авур, гьа зегьметда жуван бахт жагъай кас я. И кардал за дамахни ийизва».
Гьакъикъатдани, мукьвара вичин 75 йис тамам хьун къейд авур М. Къадиров хуьруьнвийриз халис зегьметчи, къени инсан, чIехи ва гьуьрметлу хзандин кьил яз чида.
М. Къадирова вичин зегьметдин рехъ 1955-йисуз Бакуда нафтIадин мяденра кIвалах авунилай башла-мишна. Гьана ада тракториствилин пешени къачуна.
Жегьилдиз вичин кIвалахни бегенмиш тир, ада зегьметдиз килигай къазанжини къачузвай. Амма 1966-йисуз Кьиблепатан Дагъустанда чилер зурзун себеб яз, Мегьамед хайи хуьруьз хтуниз мажбур хьана. Хуьр арандиз куьчарзавай, ана цIийи кIвалер эцигна, хзандин къайгъу авуна кIанзавай.
Жемятдихъ галаз М. Къадирова Эминхуьре (Аламишеда) кIвалерни эцигна, гьа йисуз Дербентдин хуьруьн майишатдин техникумни акьалтIарна. 1967-йисуз адакай «Коммуна» совхоздин 3-отделенидин, 1979-йисуз цIийиз тешкилнавай «Аламишинский» совхоздин бригадир хьана. И везифаяр ада 1996-йисалди намуслудаказ кьилиз акъудна.
Гьар йисуз ципицIрин бул бегьерар битмишариз хьайи М. Къадирован тIвар райондилай къецени машгьур хьана. Са шумуд йисуз адан бригадади уьзуьмчивилел машгъул тир бригадайрин арада неинки районда, гьакI республикада кIвенкIвечи чкаяр кьунай. М. Къадирова чаз лагьайвал, бригадади вичин кIвачихъ галай уьзуьмлухрин гьар са гектардай 110-150 центнер ципицIар кIватI хъийизвай. Санлай совхозди гьа йисара 4000-4500 тонн ципицIар государ-стводиз вахкузвай. Рабочийрини механизаторри гьар йисуз премия ва алава гьакъи яз мажибдин гьар са манатдин кьилиз 7-8 манат пул къачузвай.
М. Къадирован тежрибадикай маса майишатрин бригадайри гьа йисара гегьеншдиз менфят къачузвай. ЦипицIрин бул бегьерар битмиша-рунин сирерикай Мегьамеда 1978-йисуз республикадин производ-стводин кIвенкIвечийрин делега-циядик кваз Болгариядиз фейилани суьгьбетар авунай.
М. Къадиров са шумудра хуьруьн ва райондин Советдин депутатвиле, райондин ва республикадин парт-конференцийрин делегатвиле, КПСС-дин райкомдин бюродин членвиле, 10 йисуз совхоздин парткомдин секретарвиле хкяна. Адан шикил 15 йисуз совхоздин ва райондин Гьуьрметдин доскайра хьана.
Гзаф йисара производствода гьакъисагъвилелди зегьмет чIугур Мегьамед Къадироваз Зегьметдин Баркалладин орден, са шумуд медаль, пятилеткайрин зарбачивилин, «Соцсоревнованида гъалиб хьайиди» знакар, хейлин грамотаяр, къиметлу пишкешар ганва.
Зегьметдин ветеран, чIехи ва къени хзандин кьил, хуьруьн агъсакъалрин Советдин член тир М. Къадироваз хуьруьн жемятдин арада лайихлу гьуьрметни ава. И гьуьрмет адаз багьани я.
Зазни ам к!емпли я лугьуз чида:)